ԼՂ հակամարտության կարգավորման բանակցային գործընթացը գրեթե կոմայի մեջ է. Դավիթ Բաբայան

Նախորդ շաբաթվա առաջին 5 օրերին Տավուշի մարզում եղած լարվածությունը հանգստյան օրերին տարածվել է նաեւ Լեռնային Ղարաբաղում: Արդյունքում Ղարաբաղի Պաշտպանության նախարարությունը կոշտ հայտարարությամբ է հանդես եկել՝ միջազգային հանրությանը նախազգուշացնելով, որ դեպքերի նման զարգացման շարունակականության խորացումը հնարավոր է հանգեցնի անկանխատեսելի հետեւանքների:

ԼՂՀ նախագահի մամլո խոսնակ Դավիթ Բաբայանից փորձեցինք պարզել, թե վերջին օրերի իրադարձություններով պայմանավորված որքան է մեծացել պատերազմի վտանգը, ի՞նչ իրավիճակ է հիմա սահմանին:

- Պարոն Բաբայան, ինչպիսի՞ն է իրավիճակը հայ-ադրբեջանական շփման գոտում: Գիշերը հանգի՞ստ է անցել:

- Հակառակորդը, ճիշտ է, շարունակում է խախտել հրադադարի ռեժիմը, բայց հիմա կայուն է:

- Ինչո՞վ եք պայմանավորում հրադադարի ռեժիմի խախտումների կտրուկ աճը, որովհետեւ այս անգամ կարծեք թե թիրախը ոչ միայն Ղարաբաղն էր, այլ նաեւ Տավուշի մարզի գյուղերը:

- Ընդհանրապես Ադրբեջանը չի տարբերակում Տավուշը Մարտակերտից կամ Հադրութից: Որեւէ կոնկրետ պատճառ չկա հրադադարի խախտումները հաճախակի դարձնելու. պատճառն այն է, որ Ադրբեջանը դարձել է Ֆաշիստական պետություն եւ հայությանը ընդունում է որպես թշնամի: Պետք է նշել, որ ներկա դրությամբ Ադրբեջանում բավականին ակտիվ քաղաքական շրջան է: Խորհրդարանական ընտրություններ պետք է տեղի ունենան այնտեղ: Իսկ մենք գիտենք, որ մանավանդ վերջին տարիներին, հատկապես արաբական գարուններից հետո, խորհրդարանական ընտրությունները տարբեր պետություններում բերում են սոցիալական լարվածության, զանգվածային բողոքի ակցիաների եւ այլն, որը վերջում բերում է նույնիսկ հեղափոխության: Ադրբեջանը եւ այդ երկրի իշխանությունները այս ամենը երեւի լավ են պատկերացնում: Ըստ ամենայնի այնտեղ ընթանում են բավական հետաքրքիր գործընթացներ, դրա համար ալիեւյան կլանը ագրեսիվ դիրքորոշում է որդեգրել նաեւ ներսում՝ մարդու իրավունքների պաշտպանների, ընդդիմության, «Ազատություն» ռադիոկայանի, ԵԱՀԿ գրասենյակի փակման ուղղությամբ: Այդ տեսանկյունից նրանք օգտագործում են հրադադարի ռեժիմի խախտումները, որպեսզի շեղեն բնակչության ուշադրությունը, ինչպես նաեւ դա դարձնեն քարոզարշավի մաս: Սա Ալիեւի տհաճ քարոզարշավն է, բայց դա այդպես է: Իրենց նույնիսկ ձեռք է տալիս, երբ որ իրենց զինվորները զոհվում են: Անմիջապես կազմակերպում են թաղումներ, ճառեր են ասում... սա էլ է ընտրազանգվածի հետ հանդիպման միջոց: Խոսում են հայկական ագրեսիայի մասին՝ փորձելով շեղել բնակչության ուշադրությունը ներքին խնդիրներից եւ տեղափոխել այս ամենը արտաքին դաշտ: Այո, շատ անմարդկային ձեւ է, բայց դա այդպես է: Այս լարվածությունը նրանց ձեռնտու է եւ անում են ամեն ինչ, որպեսզի շարունակվի:

Մանրամասները՝ armtimes.com-ում