Մարզահամերգային համալիրին պատճառվել է 200 մլն դրամի վնաս

Մարզահամերգային համալիրում նոյեմբերի 17-ին տեղի ունեցած հրդեհը մոտ 200 մլն դրամի գույքի վնաս է հասցրել նախկին սեփականատերերին: Այս մասին այսօր՝ նոյեմբերի 21-ին, լրագրողների հետ զրույցում ասաց ՄՀՀ նախկին աշխատակից Կորյուն Գրիգորյանը:

«Մեր առաջնային խնդիրը հիմա ամբողջ պատկերը ստանալն է: Հիմա պետք է հասկանալ, այն ամբողջ տեխնիկան, որը լուրջ մակարդակի ֆրանսիական տեխնիկա է, որի ցուցակը մենք ունենք, դրա՞նք են վնասվել, թե՞ ավելին: Ինձ թույլ չեն տալիս ներս մտնել՝ պատճառաբանելով, որ խառը վիճակ է, և այն ինֆորմացիան, որը ես հիմա ունեմ, ուզում եմ ամբողջացնել»,- ասաց Կորյուն Գրիգորյանը և հավելեց, որ պաշտոնական գրությամբ դիմել են ԱԻՆ և ՊՆ, որպեսզի վնասված իրերի ցուցակը հստակեցնեն:

Ըստ նրա՝ վնասը մեծ չէր լինի, եթե պահպանվեին անվտանգության տարրական կանոնները:

«Աբսուրդ է, որ այդքան երիտասարդներ են հավաքվել, և այդ երիտասարդների անվտանգության համար չեն մտահոգվել: Անվտանգության տարրական միջոցներ չեն ձեռնարկվել, այնտեղ չի եղել «Շտապօգնության» մեքենան, նախօրոք պետք է հրշեջ ծառայությունից մեկ միավոր հրավիրված լիներ»,- ասաց Կորյուն Գրիգորյանը:

Խոսելով պատասխանատվություն կրողների մասին, Կորյուն Գրիգորյանը նշեց, որ իրենք հետամուտ են լինելու, որ բոլոր մեղավորները պատժվեն: