«Մեծացավ, աճեց, իր տաղանդը ցույց տվեց, բայց անժամանակ հեռացավ»

Այսօր Ստանիսլավսկու անվան ռուսական դրամատիկական թատրոնում տեղի ունեցավ  թատրոնի ու կինոյի դերասան Երվանդ Ենգիբարյանի քաղաքացիական հոգեհանգստի արարողությունը: Դերասանին վերջին հրաժեշտը տալու  էին  եկել երկրպագուները, գործընկերներն ու երիտասարդ դերասանի տաղանդով հիացող ավագ ընկերները: Forums.am-ի հետ զրույցում դերասան Բորիս Պեպանյանը ցավ հայտնելով երիտասարդ դերասանի համար նշեց. «Դաժան է, ինչ ասես: Ոչինչ չես կարող ասել: Տաղանդավոր մի դերասան, երիտասարդ, կյանքով լիքը: Երբ փոքր տարիքում հոր հետ գալիս էր թատրոն գրկում էինք, բարձրացնում բեմին: Մեծացավ, աճեց, իր տաղանդը ցույց տվեց: Աստված հոգին լուսավորի: Այնքան երիտասարդ էր` մարդու լեզուն էլ չի պտտվում: Աստված հոգին լուսավորի»: Արվեստի վաստակավոր գործիչ, դերասան Հայկ Մնացականյանը Երվանդին մանկուց գիտե ու միշտ էլ հիացել է դերասանի տաղանդով. «Նրան մեծ ապագա էր սպասվում, դերասանական փայլուն ապագա: Անհասկանալի բաներ են կատարվում: Ճիշտ չէր, երիտասարդ էր: Թատրոնն իրոք մեծ կորուստ տվեց: Ես ուղղակի, որպես դերասան գնահատում եմ նրա տաղանդը»: Հիշեցնենք, որ հոկտեմբերի 22-ին ժամը 05:00-իսահմաններում ողբերգական ավտովթարի հետևանքով կյանքից հեռացավ 30-ամյա դերասան Երվանդ Ենգիբարյանը:

Զառա   ՂԱԶԱՐՅԱՆ