Մեր միակ ապավենը պետք է մենք լինենք՝ ինչպես Արցախյան պատերազմում

Shabat.am-ը գրում է. Այսօր՝ նոյեմբերի 14-ին, արցախյան հարցով փորձագետ, Ընդդեմ իրավական կամայականության» Հ/Կ գործադիր տնօրեն Լարիսա Ալավերդյանը մամուլի ասուլիսին ասաց, որ ԼՂՀ հակամարտությամբ զբաղվում են ամենաբարձր մակարդակով և ավելացրեց, որ երբևէ որևէ կոնֆլիկտ չի արժանացել նման մակարդակի անդրադարձին, երբ երեք խոշոր պետությունների նախագահների ներկայացուցիչներ ներկայացված լինեն:

«Դա արդեն հստակեցնում է, թե ինչ մեծ տեղ տրվում այս տարածաշրջանի իրավիճակին»,-ասաց նա:

Լարիսա Ալավերդյանը համոզված է, որ մադրիդյան սկզբունքների տրանսֆորմացիայի անհրաժեշտություն կա: Նա ադրբեջանական ԶՈՒ-ի կողմից ԼՂՀ ԶՈւ ուղղաթիռի խոցման տրամաբանական շարունակությունը համարեց ադրբեջանական լրատվամիջոցներում տեղի ունեցածը և նշեց, որ Ադրբեջանի կողմից անգրագիտություն է այդ տարածքները համարել իրենցը:

ԳԱԱ Գրականության ինստիտուտի փոխտնօրեն, Արցախյան պատերազմի մասնակից, ԵԿՄ անդամ Վարդան Դևրիկյանը կարծում է, որ Ադրբեջանն այս քայլով ռազմատեխնիկական նոր իրավիճակ ստեղծեց:

«Ադրբեջանի այս քայլին նպաստեցին հուլիս-օգոստոսյան մեր փայլուն պատասխանները: Այսինքն՝ Ադրբեջանը, ցամաքային պատերազմում տանուլ տալով, որոշեց այդ պատերազմը տեղափոխել օդ»,-ասաց նա և նշեց, որ նախպատարաստական կամ կիսապատերազմական իրավիճակ է:

Ըստ նրա՝ մեր զինվորական հրամատարությունը պետք է անդրադառնա մեր պատասխան տալուն, և մեր ռազմավարական ղեկավարությունը գիտի ինչպես դա անել:

Լարիսա Ալավերդյանը նաև նկատեց, որ Ադրբեջանը ներքին դաշտում չի ընդունում, որ օգստոսին ինչ-որ պարտություն է կրել, այլ նշում է, որ իրենք հաղթեցին նաև օդում:

«Ես մի բան գիտեմ, պետք չէ հույսը կապել ուրիշների հետ, լինի դա Ռուսաստանը, թե մեկ այլ ուրիշ երկիր: Մեր միակ ապավենը պետք է մենք լինենք՝ ինչպես Արցախյան պատերազմում, որը մենք պատվով հաղթեցինք»,-ասաց նա: