Միջազգային մամուլը՝ Ստեփանակերտի առօրյա կյանքի,Բաքվի ու Երևանի միջև տեղեկատվական պատերազմի մասին

Միջազգային մամուլը՝ Ստեփանակերտի առօրյա կյանքի,Բաքվի ու Երևանի միջև տեղեկատվական պատերազմի մասին

Քառօրյա պատերազմը լուսաբանած The New York Times-ի թղթակից Էնդրյու Քրամերը առանձին հոդված է նվիրել Լեռնային Ղարաբաղի մայրաքաղաք Ստեփանակերտին: Հաղորդում է «Ազատությունը»:

«Որպես կանոն, պատերազմի ազդեցությունը կրող հետխորհրդային չճանաչված տարածաշրջանների մայրաքաղաքները աչքի են ընկնում աղքատությամբ և անխնամ վիճակով: 50 հազար բնակիչ ունեցող Ստեփանակերտը, սակայն, անսպասելիորեն աշխույժ քաղաք է», — նշում է The New York Times-ի թղթակիցը: «Այս ամսվա սկզբին Ադրբեջանի հետ եռօրյա պատերազմի մեջ հայտնված այս քաղաքում ամենուր նկատելի են հարուստ սփյուռքի լուրջ ուշադրության և շռայլության դրսևորումները: Բլրի վրա վեր է խոյանում նոր հիվանդանոցի շենքը, քաղաք տանող ճանապարհը նոր է ասֆալտապատվել», — գրում է ամերիկացի լրագրողը՝ մանրամասնելով․ — ««Ղարաբաղին միջոցներ էր տրամադրում հանգուցյալ կալիֆորնիացի գործարար Քըրք Քըրքորյանը: Շվեյցարահայ մի գործարար «Ոսկե ձկնիկ» կոչվող ձկնաբուծարան է հիմնել, որտեղ թառափ են աճեցնում»: «Կալիֆորնիան և ևս վեց ամերիկյան նահանգներ ճանաչել են ինքնահռչակ հանրապետությունը: Դաշնային կառավարությունը, ինչպես նաև աշխարհի որևէ այլ կառավարություն, այդ քայլին չի դիմել», — գրում է The New York Times-ը:

«Ռուսական ներգրավվածության աստիճանը Լեռնային Ղարաբաղում կարծես աճում է», — պնդում է Financial Times-ի մոսկովյան թղթակիցը` գրելով. — «Ռուսաստանը սկսել է հավելյալ դիվանագիտական ջանքեր գործադրել մի իրավիճակում, երբ Եվրոպայի ամենադժվար հանգուցալուծվող հակամարտություններից մեկը [լայնածավալ] պատերազմի վերաճելու շեմին է»:

Հպանցիկ կերպով նկարագրելով ապրիլի 2-5-ը տեղի ունեցած իրադարձությունները` թերթի թղթակիցը հատուկ ընդգծում է այն հանգամանքը, որ հայկական և ադրբեջանական կողմերը կրակի դադարեցման մասին պայմանավորվածությունը ձեռք բերեցին Մոսկվայի միջնորդական ջանքերի շնորհիվ, չնայած այն իրողությանը, որ գոյություն ունի խնդրով զբաղվող Մինսկի խումբ:

Financial Times-ը այս առթիվ մեջբերում է Լոնդոնում Ադրբեջանի դեսպան Թաիր Թաղիզադեի խոսքը․ — «Ինձ մեծապես զարմացրեց այն զգալի ժամանակահատվածը, որ պահանջվեց ԵԱՀԿ-ի Մինսկի խմբի համանախագահներից պարզապես հավաքվելու համար»:

«Ինչ վերաբերում է Լեռնային Ղարաբաղի հիմնախնդրի կարգավորման գործում ամերիկյան ներգրավվածությանը, ապա Վաշինգտոնում նման քայլի դիմելու մեծ ցանկություն չունեն», — վկայակոչելով Միացյալ Նահանգները ներկայացնող դիվանագետների հետ մասնավոր զրույցները` նշում է Financial Times-ի թղթակիցը: Ամերիկացի դիվանագետներից մեկը թերթին խոստովանել է, որ Վաշինգտոնում ապրիլի 2-ին չեն ունեցել անգամ Լեռնային Ղարաբաղում ծավալվող իրադարձությունների արբանյակային պատկերը: «Պարզվեց, որ այդ տարածաշրջանը դիտարկող ամերիկյան բոլոր արբանյակները հետևում են կամ Սիրիային, կամ էլ Ուկրաինային», — գրում է Financial Times-ը:

«Ո՞վ է հաղթել հայ-ադրբեջանական տեղեկատվական պատերազմում»․ այս հարցի պատասխանն է փորձում գտնել Eurasianet.org կայքի Թբիլիսիի թղթակից Ռոբին Ֆորեսթյեր-Ուոքերը: «Արտասահմանցի լրագրողներից շատերը կարողացան առանց խոչընդոտների և արագորեն Հայաստանի տարածքով մուտք գործել Լեռնային Ղարաբաղ և ժամանելուն պես հավատարմագրվել Ստեփանակերտում», — գրում է Eurasianet–ը՝ հավելելով․ — «Տեղացի պաշտոնյաները քաղաքի կենտրոնական հյուրանոցում ամենօրյա մամուլի ասուլիսներ էին անցկացնում` [լրագրողներին] նաև հարցուպատասխանի հնարավորություն ընձեռելով: Հայաստանի հանրային հեռուստատեսությունը իր շարժական կայանը ազատորեն տրամադրում էր ուղիղ կապ հաստատելու անհրաժեշտություն ունեցող այլ լրագրողների ևս: Բացի այդ, լրատվամիջոցների ներկայացուցիչներին հնարավորություն էր տրված քաղաքացիական մեքենաներով մեկնել ճակատային գիծ»: