Մինչև օգոստոսի 10-ը ջերմաստիճանը կնվազի, ապա կրկին կբարձրանա

Araratnews.am-ը գրում է.

Այս տարի Հանրապետությունում հուլիս ամսին գրանցված ջերմաստիճանը դասվում է ամենաշոգ հուլիսների շարքին:  Այս մասին այսօր լրագրողների հետ հանդիպմանը տեղեկացրեց ՀՀ ԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը:

Հուլիսի 1-10-ը օդի ջերմաստիճանն Արարատյան դաշտում մինչև 40 աստիճան է բարձրացել, իսկ հուլիսի 25-ից մինչև օրս Արարատյան դաշտում օդի ջերմաստիճանը տատանվել է 39-41 աստիճանի սահմաններում: Հանրապետությունում ամենաշոգ օրը գրանցվել է օգոսոսի 2-ին: Արարատյան դաշտում 41 աստիճան է գրանցվել, իսկ մայրաքաղաքում գրանցվել է  40, 6 աստիճան:  Այս ամենին զուգահեռ գրանցվել են նաև եղանակային անոմալ երևույթներ: Օրինակˋ Հանրապետությունում  41 աստիճան շոգից հետո անձրև է գրանցվել:

1843 թվականից մինչև օրս հանրապետությունում նման տևական շոգեր չեն գրանցվել: Այս ամենով հանդերձˋ բանախոսը նկատեց, որ այս տարի ջերմաստիճանի ռեկորդներ չեն գրանցվել:  Ինչ վերաբերում  է ռեկորդներին, ապա դրանք գրանցվել են 2011 թվականի հուլիսի 31-ին Մեղրիումˋ 43,7 աստիճան, իսկ  2010-ին Երևանումˋ  42 աստիճան:

Այսօրվանից սկսած մինչև օգոսոսի 10-ը ջերմաստիճանը կնվազի 4-5 աստիճանով, իսկ հուլիսի 10-ից Իրանի տարածքից նոր ջերմային ալիքներ կթափանցեն Հանրապետություն, իսկ ջերմաստիճանը կրկին կբարձրանա. օգոստոսի 10-ին կգրանցվի 37 աստիճան տաքություն, 11-ինˋ 39, իսկ 13-15-ն ընկած ժամանակահատվածումˋ 40 և ավելի, իսկ առաջիկա օրերին օդի ջերմաստիճանը չի բարձրանա 36 աստիանից:

Բանախոսը նկատեց, որ օդի ջերմաստիճանի բարձրացմամբ պայմանավորված Հանրապետությունում ստեղծվել է խիստ, 5-րդ կարգի հրդեհավտանգ իրավիճակ: