Նախկին զինդատախազը ԱԺ-ում ներկայացրեց Արամ Մանուկյանի վրա հարձակման սեփական վարկածը

Արամ Մանուկյանի վրա հարձակվողը բռնցքամարտիկ է, այսօր ԱԺ-ում, որպես նախկին զինդատախազ, նման կարծիք հայտնեց ԱԺ ՀԱԿ խմբակցության պատգամավոր Գագիկ Ջհանգիրյանը:

Նման եզրահանգման առիթ նրան տվել է այն հանգամանքը, որ Արամ Մանուկյանի վրա հարձակվողը նրան հարվածել է բռնցքամարտիկին հատուկ շարժումով, ընդ որում՝ ձախ ձեռքով:

«Ես դեպքից րոպեներ անց իրավապահների ներկայությամբ դիտել եմ տեսանյութը»,- ասաց Գագիկ Ջհանգիրյանը՝ հավելելով, որ հարձակվողը շենք է մուտք գործում Արամ Մանուկյանից ընդամենը 30 վայրկյան առաջ, ինչը, իր համոզմամբ, նշանակում է, որ նրան ուղղորդել են:

Նա նաև անդրադարձավ քրեական գործի հիմքում դրված քրեական օրենսգրքի հոդվածին՝ նշելով, որ այն չի համապատասխանում Արամ Մանուկյանի ստացած վնասվածքին, քանի որ համակարգչային տոմոգրաֆիան ախտորոշել է ուղեղի ցնցում, որը ծանր մարմնական վնասվածք է:

Նկատենք, սակայն, որ Ա.Մանուկյանի նկատմամբ նշանակված դատաբժշկական փորձաքննության եզրակացությամբ լիարժեք գնահատական չի տրվել նրան պատճառված մարմնական վնասվածքների աստիճանին։ Այս մասին նախօրեին հայտնել էր ՀՀ քննչական կոմիտեն և հավելել, որ, ըստ եզրակացության, գլխուղեղի ցնցման ելքի ոչ պարզ լինելու հետ կապված՝ առողջությանը պատճառած վնասի աստիճանը կորոշվի դեպքի օրվանից երեք շաբաթ հետո` 31.12.2014 թվականին: