Նախկին ոստիկանը այսօրվանից մտածում է տուժող կնոջը պատժելու մասին

Փաստինֆոն գրում է. «Եթե դատարանը ինձ դատի անգամ 1 ժամ, ապա ակնհայտ է, որ դատարանի վրա գործադրվել է ճնշում դատախազի կողմից»: Այս մասին իր պաշտպանական ճառում հայտարարեց ավազակային հարձակման, տուժող կնոջն ու նրա անչափահաս դստերն առևանգելու, կնոջը բռնաբարելու մեջ մեղադրվող նախկին ոստիկան Էդգար Վարագյանը: Նա հավելեց՝ գործը «կարվել է» 1937թ. մեթոդներով:

Ամբաստանյալը դժգոհություն ուղղեց նաև դատարանին՝ հայտարարելով, որ դատարանը բազմիցս մերժել է «կարևոր վկաներ» հրավիրելու և հարցաքննելու իր և իր պաշտպանի միջնորդությունները, այնինչ այդ վկաների ցուցմունքները լույս կսփռեին գործի վրա:

Տուժող կինը հայտարարում է «իբրև ես եմ» իրեն բռնաբարել, ասաց ամբաստանյալը, հայտարարելով՝ «շատ կցանկանայի տեսնել այդ «անասունին, որ նրան բռնաբարել է»: Ապա փորձելով իրենից հեռացնել մեղադրանքը, նա հեգնական արտահայտություններ արեց տուժողի արտաքինի վերաբերյալ: Ապա անցավ ավելի վիրավորական ձևակերպումների՝ իրանահայ տուժողին վերագրեց մուսուլմանական ծագում, ով շարունակում է իր՝ հայ քրիստոնյաին, իր ընտանիքը կործանել՝ «մեղադրողի հովանավորությամբ»:

Իր ճառում ամաստանյալը փորձեց հրապարակել տուժողի ցուցմունքները, սակայն դատարանը նրան հիշեցրեց, որ տուժողը ցուցմունք է տվել դռնփակ դատական նիստում և որ ամբաստանյալը իրավունք չունի դրանք հանրայնացնել:

Մինչ իր ճառին հրապարակմանն անցնելը ամբաստանյալը հայտարարեց, որ կցանկանար, որպեսզի տուժողը ևս ներկա գտնվեր, քանի որ իր ճառը հիմանականում նախատեսված է նրա համար: Նա ընդգծեց, որ ցանկանում է տուժողի վերջնական դիրքորոշումը լսել, որպեսզի նրան պատժելու ժամանակ իմանա, թե ինչպես պատժի, «ոնց որ իրենք ինձ պատժեցին»:

Ամբաստանյալը վիրավորական արտահայտություններ հնչեցրեց նաև մեղադրողի հասցեին՝ անվանելով նրան «տականք», «ազգի դավաճան»: Քանի որ հնչեցին նաև այլ, ոչ դատարանական արտահայտություններ ևս, ուստի նախագահող դատավորը երկու անգամ ամբաստանյալին նախազգուշացնելուց հետո, ասաց, որ կրկնվելու դեպքում ամբաստանյալը կհեռացվի դատական նիստերի դահլիճից և որ նիստը կանցկացվի իր բացակայությամբ:

Ամբաստանյալի պաշտպանական ճառի հրապարակումը ընդմիջվեց աշխատանքային օրվա ավարտի կապակցությամբ, պաշտպանական ճառի հրապարակումը կշարունակվի հաջորդ դատական նիստում: