«Նման անհեթեթություններ տարածողներին ես խորհուրդ կտամ գոնե մեկ անգամ լինել Ուկրաինայում, եւ»...

Տևական ժամանակ է, ինչ մամուլը գրում է այն մասին, թե Ուկրաինայում Հայաստանի դեսպան Անդրանիկ Մանուկյանը իր պարտականությունները պատշաճ ու լիարժեք ձեւով չի կատարում, եւ որ դեսպանությունը այսպես ասած անգործության է մատնված: Ավելին, մամուլը շատ հաճախ է «հղում» անում պտտվող այն լուրերին, թե Անդրանիկ Մանուկյանը՝ տարբեր ժամանակներում հայտնվում է նաեւ սկանդալների ու միջադեպերի կենտրոնում: Վերջին մեղադրանքը որ հնչեց դեսպանի հասցեին այն էր, որն նա երբեմն ճիշտ ձեւով չի տեղ հասցնում հայկական կողմի դիրքորոշումները, եւ որ իբրեւ դա էր հայ-ուկրաինական հարաբերությունների  սրման պատճառը:

Այս և այլ խոսակցությունների շուրջ, Fnews.am-ը փորձեց ստանալ Ուկրաինայում Հայաստանի դեսպան Անդրանիկ Մանուկյանի մեկնաբանությունը, ով մեզ հետ զրույցում ասաց հետեւյալը.«Նման անհեթեթություններ տարածողներին ես խորհուրդ կտամ գոնե մեկ անգամ լինել Ուկրաինայում և հայ համայնքից հարցնել իմ, և առհասարակ դեսպանատան կատարած աշխատանքների մասին: Դրանից հետո արդեն թող սկսեն լուրեր տարածել: Իսկ այն, որ ես կառավարության խոսքը տեղ չեմ հասցնում կամ թերանում եմ իմ աշխատանքում, ցավով պետք է նշեմ, որ դա ինչ-որ մեկի բացարձակ հիվանդ երևակայության արդյունք է: Հայ-ուկրաինական հարաբերությունները լարվեցին դեռևս Վիկտոր Յուշչենկոի ժամանակ, երբ Ուկրաինան, Մոլդովան, Ադրբեջանը և Վրաստանը ստեղծել էին «ՎՈՒԱՄ»-ը: Ապա նախագահ ընտրվեց Յանուկովիչը, իսկ ես Ուկրաինայում Հայաստանի դեսպանն էի, եւ պիտի ասեմ, որ մեր հարաբերությունները հիանալի էին՝ բոլոր առումներով: Հայաստանի և Ուկրաինայի միջև հարաբերությունները լարվեցին 2014 թվականին, երբ ՄԱԿ-ում Հայաստանը Ղրիմի հարցով դեմ քվեարկեց Ուկրաինային, կողմ քվեարկելով Ռուսաստանին: Այդ առիթը Ադրբեջանը բաց չթողեց և խրախուսելով ուկրաինական լրատվամիջոցներին, սկսեց տարածել հակահայկական տեղեկություններ»:

Դիտարկմանը, թե հունվարի 26-ի հայտնի նիստում Եվրոպայի խորհրդի խորհրդարանական վեհաժողովում (ԵԽԽՎ) ծավալված թեժ քննարկման ժամանակ ինչո՞ւ հակահայկական դիրքորոշմամբ աչքի ընկավ նաեւ Ուկրաինան, եւ թե այս պատմության համատեքստում ինչո՞ւ են լուրեր պտտվում, թե դեսպանի «առաքելությունն» իրականացրել են ԱԺ պատգամավորներ Հրանտ Բագրատյանը, Թեւան Պողոսյանն ու Արտակ Զաքարյանը, Անդրանիկ Մանուկյանը պատասխանեց, որ.«Իսկապես Հրանտ Բագրատյանը, Թևան Պողոսյանը և Արտակ Զաքարյանը եղել են Կիևում: Արտակ Զաքարյանն ինձ հետ ներկա է եղել բոլոր հանդիպում-քննարկումների ժամանակ: Դուք կարող եք անձամբ Արտակ Զաքարյանից հարցնել իմ գործունեության, հայ համայնքի վիճակի մասին: Չգիտեմ, Բագրատյանի և Պողոսյանի հանդիպումները ինչ ընթացք են ունեցել, բայց գիտեմ, որ նրանք ունեցել են հանդիպումներ և քննարկումներ, ու բավականին աշխատանք են տարել: Իսկ մյուս անհեթեթություններից ես արդեն հոգնել եմ և անգամ ժամանակ չեմ տրամադրում դրանք որևէ կերպ մեկնաբանելու համար»:

Հ.Գ Ի դեպ, Ուկրաինայի հայ համայնքի վեր ու վարն իմացող մեր հայրենակիցներից մեկն էլ, ում հետ զրույցի էի բռնվել մի հանդիպման ժամանակ, խոսելով Ուկրաինայում Հայաստանի դեսպան Անդրանիկ Մանուկյանի մասին, հետաքրքիր դիտարկում արեց, ասելով հետեւյալը. «Ինչ-ինչ դրդապատճառներով ինչքան էլ որ փորձում են կենտրոնանալ Անդրանիկ Մանուկյանի ուղղությամբ, այնքան նրա ազդեցիկությունը մեծանում է: Գիտեք, կադրից դուրս չերեւացող գործեր կան՝ հանուն հայ համայնքի զարգացման ու կայացման, որ խոսքերից առավել են:
Անդրանիկ Մանուկյանը իսկապես հայրենասեր ու պետականամետ գործիչ, ով կարողանում է Ուկրաինայի նման պետության ներսում համախմբել, լուծել ու կարգավորել երեւացող ու չեւերացող այնպիսի կարեւորագույն հարցեր, որոնք գուցե ի վիճակի չլինեն իրականացնելու այն թավշյա դեմքով երեւույթները, ովքեր բառեր արտասանելուց եւ աջ ու ձախ չարախոսելուց այն կողմ ոչինչ անել չեն կարող»:

Մեր հաջորդ հրապարակման շրջանակներում կանդրադառնանք նաեւ միջազգային մամուլի հրապարկումներին՝կապված դեսպանի գործունեության ու նրա կատարած աշխատանքների մասին, որի վերաբերյալ  բավականին հետաքրքիր գնահատականներ կան...