Նման մեթոդները զոհեր են բերում, եւ որպես կանոն՝դրանք ձախողվում են

Հայաստանի մարդու իրավունքների առաջին պաշտպան Լարիսա Ալավերդյանը չի դադարում կրկնել, որ միշտ դեմ է եղել ապստամբությամբ իշխանափոխությանը և քաղաքական պայքարներին: Ոչ թե միայն նրա համար, որ նման մեթոդները զոհեր են բերում, այլև, ըստ նախկին օմբուդսմենի` դրանք արդյունավետ չեն և որպես կանոն ձախողվում են:

Fnews.am-ի հետ զրույցում անդրադառնալով «Հիմնադիր խորհրդարան»-ի և «Սասնա ծռեր»-ի համատեղ կազմակերպված հեղափոխությանը` մարդու իրավունքների առաջին պաշտպանը նկատեց, որ նման նախաձեռնությունները հաճախ հակառակ ազդեցություն են ունենում:

«Խախտվում է եղած պայքարի մթնոլորտը, որն ինչ-որ չափով կարգավորված է, հիմա արդեն հասկանալի է, որ մթնոլորտը նորից փոխվելու է: Բացի այդ այն իրավիճակում ու այն ժամանակներում, որտեղ մենք գտնվում ենք, ես չեմ կարծում, որ այդ մեթոդները պահանջված են ու դրանց կարիքը կա»,-ասում է Լարիսա Ալավերդյանը:
Որքան էլ խոսեն, թե ապստամբությունը մարդու իրավունքների պաշտպանության ծայրահեղ միջոցներից մեկն է, այնուամենայնիվ նախկին օմբուդսմենը ընդգծում է, որ այն պետք է հաշվարկված լինի, որպեսզի հասկանանք, թե ինչու և ինչ իրավիճակում է արվում: Ժամանակը, միջոցները, տեղը պետք է արդարացված լինեն:

Լարիսա Ալավերդյանը վստահեցնում է, որ նույն այդ անազատության մեջ գտնվող տղաների համար ինքը ևս կպայքարի, բայց միայն իրավական շրջանակում, իսկ նրանց ազատությունը պահանջող «հեղափոխականների» ընտրած տարբերակը օմբուդսմենն անընդունելի է համարում` հատկապես Հայաստանի հարևան երկրների պարագայում ու առկա իրավիճակում:
Լարիսա Ալավերդյանը, որպես իրավաբան դժվարանում է իրավիճակը որակել, իբրև ահաբեկչություն: Նա նկատում է, որ հաշվի անելով ապստամբների կողմից առաջ քաշված պահանջները կարելի է նաև այդպես կոչել, միևնույն ժամանակ նա ինքն անձամբ, գոնե մինչև իրավիճակի ուսումանսիրությունը, զերծ է մնում նման որակումներից:
«Սպասենք դեպքերի զարգացումներին… Հուսանք, որ այդ ճանապարհը բռնած տղաները չեն գնա ծայրահեղ միջոցմների և հուսանք, որ ոստիակնությունը պատշաճ համբերություն կդրսևորի և բռնություն չի կիրառի… պետք է հասկանանք, որ այսպիսի զարգացումների շարունակելիությունը մթնոլորտ է փոխելու Հայաստանում»,- ընդգծեց առաջին օմբուդսմենը: