Նոր մանրամասներ Երևանում ամուսինների սպանությունից. սպանություն կատարողը նույն զենքով կրակել է իր վրա

Shamshyan.com-ի տեղեկություններով, քիչ առաջ Քանաքեռ-Զեյթունի բաժնի ոստիկաններն ու քննչական բաժնի քննիչները հայտնաբերել են այսօր Քանաքեռ-Զեյթուն վարչական շրջանում ամուսիններ Հովհաննես և Լուսինե Մխիթարյաններին սպանած կասկածյալին:

Ինչպես հայտնում է ֆոտոլրագրող Գագիկ Շամշյանը, վերջինիս հայտնաբերել են հրազենային վնասվածքով. նա իր մոտ եղած ատրճանակով կրակել է իր վրա: Այս պահին նրան տեղափոխում են հիվանդանոց: Ֆոտոլրագրողի տեղեկություններով, ատրճանակը, որով նա կատարել էր սպանությունը և այնուհետև փորձել ինքնասպան լինել, նրան տրամադրել է Արտաքին գործերի նախարարությունը:

Ինչպես ավելի վաղ հայտնել էր Shamshyan.com-ը, Ուլնեցի փողոցի թիվ 30 շենքի մոտ գտնվող 165 ավտոտնակի մոտ անհայտ անձը հրազենից արձակած կրակոցով սպանել է 1 կնոջ և 1 տղամարդու: 

Դեպքի վայր են ժամանել ոստիկանության Երևան քաղաքի վարչության մեծ թվով աշխատակիցներ՝ վարչության պետ ոստիկանության գեներալ-մայոր Աշոտ Կարապետյանի և վարչության պետի օպերգծով տեղակալ, ոստիկանության գնդապետ Արթուր Մեհրաբյանի գլխավորությամբ: Ժամանել են նաև ոստիկանության Քանաքեռ-Զեյթունի բաժնի օպերատիվ խումբը՝ բաժնի պետ Ավետիք Աբրահամյանի գլխավորությամբ: Օպերատիվորեն ժամանել են նաև Երևանի 1-03 շտապօգնության թիվ 11 բրիգադը, սակայն բժիշկները անզոր են եղել բուժօգնություն ցուցաբերել, քանի որ ամուսինները տեղում մահացել են: 

Ֆոտոլրագրող Գագիկ Շամշյանը հայտնել է, որ ժամանել են նաև ոստիկանության քրեական հետախուզության գլխավոր վարչության պետի առաջին տեղակալ Սամվել Ասատրյանը և նույն վարչության 2-րդ վարչության պետ Ալիկ Մարգարյանը: Հաշվի առնելով հանցագործության վտանգավորության աստիճանը դեպքի վայր են ժամանել նաև Քանաքեռ-Զեյթուն վարչական շրջանի դատախազության աշխատակիցները՝ դատախազի պաշտոնակատար Դավիթ Կարապետյանի գլխավորությամբ: Դեպքի վայրի տեղազննման աշխատանքներ են կատարել Հայաստանի քննչական կոմիտեի Երևանի քննչական վարչության Քանաքեռ-Զեյթունի քննչական բաժնի քննիչները՝ քննչական բաժնի պետի տեղակալ Արտակ Մկրտչյանի գլխավորությամբ: 

Ոստիկանությունն ու քննչական բաժինը պարզել են, որ սպանվածները 53-ամյա Հովհաննես և 44-ամյա Լուսինե Մխիթարյաններն են եղել: Ֆոտոլրագրողը հայտնել է, որ դեպքի վայրում հայտնաբերվել է կրակված 3 պարկուճ: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Shamshyan.com