Նորիկ Գևորգյանն ակտիվ, հայրենասեր անձնավորություն է. Մարկոս Սրբազան

Հայ Առաքելական Սուրբ Եկեղեցու Ուկրաինայի թեմի առաջնորդ Մարկոս եպիսկոպոս Հովհաննիսյանը ՛՛Դե ֆակտո՛՛ ամսագրի հետ զրույցում կարծիք է հայտնել Կիևի հայ համայնքի ղեկավար Նորիկ Գևորգյանի մասին:

Ընդամենը երկու ամիս է՝ Ուկրաինայում գործունեություն եմ իրականացնում հայկական համայնքային ու եկեղեցական դաշտում, ուստի Նորիկ Գևորգյանի հետ ծանոթացել եմ վերջերս: Նա ակտիվ, հայրենասեր անձնավորություն է՝ նվիրված իր ազգային եկեղեցական արժեքներին: 
Վստահ եմ, որ իր գլխավորությամբ կատարվող համայնքային կառավարման խորհուրդը լուրջ արդյունքներ պետք է արձանագրի առաջիկայում նախատեսված ծրագրերում, քանի որ Նորիկ Գևորգյանը շատ հետևողական է:
Մեծ գնահատանքի են արժանի Կիևում Հայոց ցեղասպանության 100-րդ տարելիցին նվիրված լայնածավալ միջոցառումները. ֆլեշ-մոբ, ուկրաիներենով և ռուսերենով ,Հիշում եմ և պահանջումե խորագրով 500-ից ավել պաստառների փակցնում Կիևի տարբեր փողոցներում և այլն:
Գոհունակությամբ պետք է նշեմ, որ այժմ Ուկրաինայում հայ համայնքի միջոցներով Կիևում կառուցվում է Հայոց առաջնորդանիստ եկեղեցին, որի կողքին Կիևի հայ համայնքի միջոցներով կառուցվում է համեմատաբար փոքր մատուռը: Եթե աշխատանքները շարունակեն ընթանալ այս տեմպերով, ապա երկու ամիս անց փոքր մատուռը պատրաստ կլինի օծման:
Բացի այդ, եկեղեցու կողքին կառուցվում է 100-150 հոգու համար նախատեսված մատաղատուն սրահ, որտեղ նախատեսվում է ամեն կիրակի պատարագից հետո կազմակերպել հանդիպումներ, հոգևոր և ազգային թեմաների շուրջ զրույցներ, ինչը ևս կնպաստի հայ համայնքի համախմբմանը: