Նշանածին առևանգելու և նրան բռնաբարելու գործը կքննվի դռնփակ

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց նշանածին առևանգելու և նրան բռնաբարելու գործի քննությունը:

Տուժող աղջիկը դատաքննությունը դռնփակ կարգով անցկացնելու միջնորդությամբ հանդես եկավ՝ նշելով քանի որ գործը վերաբերում է իր անձնական կյանքին, չի ցանկանում, որ այլ անձինք ևս ներկա գտնվեն, ուստիև միջնորդեց դատաքննությունն անցկացնել դռնփակ:

Կողմերը չառարկեցին, իսկ դատարանը բավարարեց ներկայացված միջնորդությունը:

Իսկ մինչ այս այսօր դատարանը որոշեց ապացույցների հետազոտման հաջորդականությունը, ըստ որի՝ նախ կհարցաքննվի տուժողը, ապա՝ վկաները, կհետազոտվեն գործում առկա գրավոր ապացույցները, որից հետո կհարցաքննվեն ամբաստանյալները:

Ինչպես ավելի վաղ տեղեկացրել էինք, գործով անցնում է 3 ամբաստանյալ, 32-ամյա Արտուշը մի քանի անգամ գնացել է գործընկերոջ տուն, որտեղ տեսել և հավանել է նրա քրոջը, փոխադարձ համաձայնությամբ նրանք հանդիպել են, ապա՝ լրջացրել հարաբերություններն ու նշանվել:

Նշանդրեքից որոշ ժամանակ անց աղջիկը որոշել է նշանդրության մատանին ետ վերադարձել, ինչի պատճառ է հանդիսացել այն, որ տղայի տանը կազմակերպված խնջույքի ժամանակ տղայի մերձավորները հարբել են, ձևավորվել է տհաճ մթնոլորտ, աղջկա ընտանիքը որոշել է հեռանալ նրանց տանից:

Այս ամենից հիասթափվել է աղջիկն ու որոշել խզել նշանածի հետ հարաբերությունները:

Նշանադրության մատանին վերադարձնելու մտադրության մասին, իրենց փոխհարաբերությունները վերջնականապես պարզելու նպատակով հանդիպելու և զրուցելու պատրվակով Արտուշը աղջկան հրավիրել է Երևան քաղաքի Ամիրյան փողոցում գտնվող «Սեգաֆրեդո» սրճարան, ապա քայլելով գնացել են Հանրապետության հրապարակի մոտակայք, որտեղից իր գործընկերներ Ղազարի և Լևոնի հետ, նախնական համաձայնությամբ, աղջկան նստեցրել են «Մերսեդես Ց 180» մակնիշի ավտոմեքենան՝ խաբեությամբ տուն ուղեկցելու պատրվակով, ապա նաև բռնության գործադրմամբ առևանգել են և տեղափոխել Գավառ քաղաք:

Այդ նույն օրն էլ վերադարձել են Երևան և աղջկան տարել Արտուշի տուն, որտեղ էլ վերջինս բռնաբարել է նշանածին՝ վերջինիս կամքին հակառակ մի քանի անգամ սեռական հարաբերություն ունեցել նրա հետ:

Մեղադրանք է առաջադրվել նաև Արտուշի գործընկերներին, ովքեր օգնել են նրա նշանածին առևանգման գործընթացում:
մանրամասները`pastinfo.am-ում: