Ո՞ւր են տանում Ավետիսյանների սպանության թելերը...

Գյումրիում Ավետիսյանների յոթ հոգանոց ընտանիքի դաժան սպանությունից ամիսներ անց ռուսական լրատվամիջոցներից մեկով  առաջ քաշեցին  թեզեր ու վարկածներ, որոնք, ըստ Ավետիսյանների հարազատների, նպատակ ունեն ոչ միայն խճճելու ամեն ինչ, այլեւ հանրության ուշադրությունը սեւեռելու մի այնպիսի վարկածի, համաձայն որի  հանցագործության պատվիրատու են  ուզում տեսնել հայերի, գյումրեցիների: Ըստ թերթի լրագրողի, մի բարձրաստիճան զինվորական պատմել է, որ երբ Երազգավորս գյուղի մոտակայքում հայտնաբերել են դեպի Թուրքիա գնացող Ավետիսյաններին դաժան սպանդի ենթարկած Վալերի Պերմյակովին, նա ասել է. "Ես որեւէ մեկին չեմ սպանել: Ինձ տվել են երկու "Պեպսի–կոլա" եւ երկու շաուրմա": Ապա այդ զինվորականը շարունակել է. "Բայց հետաքրքիր է, որ Կոլայի եւ շաուրմայի եւ "չեմ սպանելու" մասին այս ցուցմունքը, չգիտես ինչու, անհետացել է հարցաքննության արձանագրությունից: Ըստ նույն լրատվամիջոցի, Ավետիսյանների սպանության գործով. "դատական առաջին նիստը տեղի է ունենալու մինչեւ օգոստոսի 10-ը":

Թե, որքան՞ով է վերոնշյալ լրատվամիջոցի կողմից առաջ քաշած վարկածը հնարավորի ժանրից, եւ առհասարակ ի՞նչ ընթացքի մեջ է յոթ ամիս ընթացող նախաքննությունը, Fnews.am-ը  փորձեց պարզել Ավետիսյանների ընտանիքի փաստաբան ԵՐՎԱՆԴ ՎԱՐՈՍՅԱՆԻՑ, ով անդրադառնալով այն վարկածին, ըստ որի շատ հնարավոր է, որ Պերմյակովն այս գործում պարզապես "զոհ" է, ասաց.
-Համենայնդեպս այս պահի դրությամբ մեզ հայտնի քրեական գործում առկա ապացույցներով, մասնավորապես փորձագետի եզրակացությունները, միանշանակ խոսում են այն մասին, որ Վալերի Պերմյակովը գտնվել է Ավետիսյանների տանը եւ անձամբ է կրակել: Ինչ վերաբերում է ռուսական լրատվամիջոցներում տեղ գտած հաղորդագրություններին, ապա մեզ համար առնվազն զարմանալի է, որ լրագրողը մեջբերում է անում Վալերի Պերմյակովի ցուցմունքներից, որին այս պահին առնազն մենք ծանոթ չենք եւ լրագրողներն էլ, բնականաբար, պետք է ծանոթ չլինեին: Ուստի դրա մասին ես կարծում եմ, որ ավելի ուշ, երբ համապատասխան փուլում ծանոթ կլինենք Պերմյակովի ցուցմունքներին, համապատասխան մեկնաբանություններ էլ կլինեն:

-Այս պահի դրությամբ ի՞նչ ընթացքի մեջ է նախաքննությունը, քանի որ գիտենք, որ ռուսական կողմը եւս արդեն փոխանցել է ՌԴ իրավապահների իրականացրած նախաքննության նյութերը:

-Այո, ռուսական կողմը ՀՀ Քննչական կոմիտեին ներկայացրել է քրեական գործի իննը հատորներ, որոնք այս պահին գտնվում են թարգմանության փուլում եւ, բնականաբար, թարգմանությունից հետո որոշում կկայացվի քրեական գործերը միացնելու մասին եւ պարզ կլինի, թե կոնկրետ, որ նյութերի մասին է խոսքը գնում:

-Ո՞ւնեք տեղեկատվություն, իրեղեն ապացույցներ ռուսական կողմը ներկայացրել է՞, թե՞ ոչ:

-Այս պահի դրությամբ նման տեղեկատվության չեմ տիրապետում, քանի որ այս պահին նմանատիպ հարցերի պատասխանները մեզ  դեռ հասու չեն:

-Պարոն Վարոսյան, համենայնդեպս ներկա պահին Պերմյակովը գտնվում է ռուս իրավապահների հսկողության ներքո: Եթե մինչեւ դատավարությունը նրան չհանձնեն կամ չփոխանցեն հայկական կողմին, ինչպե՞ս է ապահովվելու նրա ներկայությունը դատական նիստերին:

-Քանի որ այս գործը ինքնին իրավական առումով աննախադեպ գործ է, ուստի այդ առումով ես որեւէ կանխատեսում անել չեմ կարող, որովհետեւ արդեն բավականին անակնկալներ եղել են: Երբ զարգացումները կլինեն, նոր մեր մեկնաբանությունները կանենք:

Տաթեւիկ Աբրահամյան