ՈԱԱԿ-ում ներկայացվեց կրթության որակի ապահովման վրացական փորձը

«Մասնագիտական կրթության որակի ապահովման ազգային կենտրոն» հիմնադրամի աշխատակազմին ներկայացվեց Վրաստանի բարձրագույն կրթության համակարգը և կրթության որակի ապահովման հարևան երկրի փորձը: ՈԱԱԿ փորձագետ Կարեն Գրիգորյանը, ով որպես միջազգային փորձագետ մասնակցել է վրացական 4 բուհերում «Կրթության կառավարում» մասնագիտության կրթական ծրագրի հավատարմագրմանը, հիմնադրամի աշխատակիցներին ծանոթացրեց վրացական լավագույն փորձին:

Գրիգորյանը նախ ներկայացրեց հարևան երկրի բարձրագույն կրթության համակարգը` մագիստրոսական կրթության կազմակերպման մոտեցումները, մասնագիտական կրթական ծրագրերի առանձնահատկությունները, բուհական ընդունելության կազմակերպումը, ուսանողների հավաքագրման և պրոֆեսորադասախոսական կազմի համալրման մեթոդները, բուհերի միջազգայնացման ուղղությամբ իրականացվող աշխատանքները:

Զեկույցի երկրորդ մասում Գրիգորյանը ներկայացրեց Վրաստանի Կրթության որակի բարելավման ազգային կենտրոնի աշխատանքները, մինչ այս իրականացրած գործընթացները և արդյունքները, փաստաթղթային հենքը, չափանիշներն ու չափորոշիչները, գործընթացի կազմակերպման առանձնահատկությունները: Համեմատական կարգով քննարկվեցին Հայաստանի և Վրաստանի հավատարմագրման մոտեցումները և օրենսդրական կարգավորումը:

Հիշեցնենք, որ հունիսի 8-19-ն ընկած ժամանակահատվածում ՏԵՄՊՈՒՍ-ի ՄԱՀԱԹՄԱ ծրագրի շրջանակներում «Կրթության կառավարում» մասնագիտության կրթական ծրագրի փորձաքննություն է իրականացվել Վրաստանի Իլյայի անվան պետական համալսարանում, Ակակի Ծերեթելիի անվան պետական համալսարանում, Շոթա Ռուսթավելիի անվան պետական համալսարանում և Սևծովյան միջազգային համալսարանում: Փորձաքննությանը Հայաստանից մասնակցել էր ՈԱԱԿ փորձագետ Կարեն Գրիգորյանը: Ավելի վաղ մասնագիտության կրթական ծրագրի փորձաքննություն էր իրականացվել հայաստանյան 4 բուհերում`Վանաձորի պետական համալսարանում (ՎՊՀ), Գորիսի պետական համալսարանում (ԳՊՀ), Հայաստանի պետական տնտեսագիտական համալսարանում (ՀՊՏՀ) և Հայաստանի պետական մանկավարժական համալսարանում (ՀՊՄՀ):