Ոչ ոք չի կարող մեզ ստիպել ճանաչել Հայոց ցեղասպանությունը. Էրդողան

Թուրքիայի նախագահ Ռեջեփ Թայիփ Էրդողանը հերթական անգամ հայտարարել է, որ միայն պատմաբանները կարող են ճիշտ գնահատական տալ 1915 թվականին տեղի ունեցած իրադարձություններին։ Այս մասին հաղորդում է թուրքական «Իհլաս» լրատվական գործակալությունը։

«Ոչ ոք չի կարող մեզ ստիպել ճանաչել, այսպես կոչված, Հայոց ցեղասպանությունը։ Մեր ասելիքը նույնն է՝ եթե դուք իսկապես ցանկանում եք լուծել այս խնդիրը, հանձնեք այն պատմաբանների դատին։ Թող որ պատմաբանները գնահատական տան 1915 թվականին տեղի ունեցած իրադարձություններին։

Մենք միլիոնավոր փաստաթղթեր ենք ներկայացրել, պատրաստ ենք նաև բացել մեր արխիվները։ Թող հայերն ու երրորդ երկրներն էլ բացեն իրենց արխիվները։ Եթե պատմաբաններն ուսումնասիրեն բոլոր փաստաթղթերն ու վճռեն, որ Թուրքիան մեղավոր է, ապա մենք պատրաստ ենք հաջորդ քայլն անել։ Սակայն խնդիրն այն է, որ Հայաստանին ձեռնտու չէ դեպքերի այսօրինակ զարգացումը, նրանք պարզապես անընդհատ կրկնում են՝ «Թուրքիան մեղավոր է»»,- ասել է Էրդողանը։

Թուրքիայի առաջնորդն ընդգծել է, որ հայկական լոբբին ահռելի գումարներ է ծախսում Հայոց ցեղասպանության միջազգային ճանաչման համար. «Հայերը կաշառում են որոշ խորհրդարանականների, որոնք առհասարակ որևէ առնչություն չունեն այս ոլորտի հետ և ոչինչ չգիտեն Հայաստանի մասին։ Արդյունքում մի քանի երկիր ճանաչում է, այսպես կոչված, Ցեղասպանությունը, իսկ հայերն ի լուր աշխարհի հայտարարում են այդ մասին։ Մինչդեռ նրանք, ովքեր գնում են այդ քայլին, անգամ չգիտեն, թե քարտեզի վրա որտեղ է Հայաստանը»։

Էրդողանը, խոսելով հայ-թուրքական արձանագրությունների մասին, հայտարարել է, որ երկկողմ հարաբերությունները կարգավորելու նպատակով թուրքերը Շվեյցարիայում գործընթաց սկսեցին, սակայն «հայերը սեղանին չնստեցին, փախան այնտեղից»։

Թուրքիայի նախագահը վերջում նաև անդրադարձել է 2014 թվականի ապրիլի 24-ի նախօրյակին իր հղած ուղերձին և նշել, որ ինքը ցավակցել է ոչ միայն հայերին, այլև թուրքերին։

Հիշեցնենք, որ 2005 թվականի ապրիլի սկզբներին Թուրքիայի վարչապետ Ռեփեջ Թայիփ Էրդողանը նամակով դիմել էր ՀՀ նախագահ Ռոբերտ Քոչարյանին՝ առաջարկելով ստեղծել պատմաբանների հանձնաժողով՝ ուսումնասիրելու «1915 թվականի իրադարձությունները»: Ապրիլի 25-ին Քոչարյանը պատասխանել էր Էրդողանի նամակին, որում, մասնավորապես, ասվում էր. «Կառավարությունների պատասխանատվությունն է՝ զարգացնելու երկկողմ հարաբերությունները, և մենք իրավունք չունենք այդ պատասխանատվությունը լիազորելու պատմաբաններին։ Հայաստանը պատրաստ է քննարկել ցանկացած հարց միջկառավարական հանձնաժողովի մակարդակով»։