Օլիգարխներին խնայում, աղքատներին «քերթում» են

Արտասահմանում, շինարարության ոլորտում աշխատող Հայաստանի քաղաքացիներից 13 տոկոս եկամտահարկ սահմանելու ԱԺ ընդունած օրենքը թեժ քննարկման առարկա է դարձել մասնավորապես գյուղական շրջաններում: Գաղտնիք չէ, որ արտագնա աշխատանքի են մեկնում հատկապես գյուղաբնակ տղամարդիկ, երբեմն նաեւ՝ իրենց կանանց հետ:

Արմավիրի մարզի Առատաշեն համայնքի տղամարդկանց զգալի մասը եւս խոպանից ուղարկած գումարներով է իրենց ընտանիքները կերակրում: Լսելով, որ ԱԺ-ն առաջին ընթերցմամբ ընդունել է «Եկամտային հարկի մասին» եւ «Շահութահարկի մասին» օրենքներում փոփոխություններ եւ լրացումներ կատարելու օրենքների փաթեթը, մարդիկ հերթական հիասթափությունն ապրեցին հայրենի իշխանություններից: Նոր օրենքը որակելով ազգակործան, Առատաշենի բնակիչ Ծերուն Ներսիսյանը մտահոգություն հայտնեց, որ դրանով երկրում հայաթափման հերթական ալիքը կբարձրանա: «Երկրից ավելի շատ ժողովուրդ դուրս կգա: Կգնան ու կհիմնավորվեն էն կողմերը»,-ասաց: 
Վերջինս չնայած արտագնա աշխատանքի փորձ չունի, բայց կիսում է խոպանչի իր ծանոթների զայրույթն առ կառավարություն, որը կարծես ամեն ինչ անում է Հայաստանն առանց հայերի թողնելու համար: «Ո՞րն ա տրամաբանությունը, որ մարդը գնա ուրիշ երկրում աշխատի, փողն ուղարկի, որ ընտանիքը սովամահ չլինի, բայց հարկ վճարի էս երկրին: Ես դեմ չեմ, որ մեր բյուջեն լցվի, բայց դրա համար թող ստեղ աշխատանքի տեղեր բացեն, որ մարդիկ մնան, աշխատեն ու փող տան բյուջեին»:

Ծերուն Ներսիսյանի կարծիքով, Հայաստանի ղեկավարությունն օլիգարխներին խնայում, իսկ մի կերպ ապրողներին «քերթում» է: «Դրանք իրանց գրպանի մի կոպեկն էլ ափսոսում են ծախսեն, մեր նման մարդկանց են մաշկահան անում: Կոպեկ-կոպեկ հավաքում ենք, որ սահմանին մահացու վիրավորված զինվորի կյանքը փրկենք, բայց իրանք վախենում են ձեռքները գրպանները տանեն: Իսկ էդ զինվորը նաեւ իրանց խաղաղությունն ա ապահովել, չէ՞...»,-ասաց ու, չկարողանալով շարունակել թեման, ձեռքն օդում թափ տվեց եւ «ինձ էլ մի խոսացրա» ասելով՝ հեռացավ:

Արցախյան գոյամարտով անցած ու հայի ինքնության պահպանման համար կռիվ տված Արամ Պողոսյանը եւս դեմ արտահայտվեց վտանգավոր այդ օրենքին: Ասաց՝ կռվել է, որ ապահով, ազատ, ինքնիշխան երկիր ունենանք, որ յուրաքանչյուրն իրեն ազատ ու պաշտպանված զգա այս հողի վրա, բայց ստացվում է այնպես, որ մարդիկ վիրավորվում, թողնում-գնում են: Պահեստազորի գնդապետի կարծիքով՝ «Եկամտային հարկի մասին» օրենքի փոփոխությամբ արտագաղթը նոր թափ կստանա: «Եթե մարդը դրսում է աշխատում, պարտավոր չէ այստեղ հարկ վճարի: Դրա համար շատերն ստիպված կթաքցնեն աշխատանք ունենալու փաստը: Իսկ դա նշանակում է, որ պետությունն իր քաղաքացուն կստիպի սուտ խոսել ու խաբել իրեն»:

Մասսայական արտագաղթի նոր ալիքը չբացառեց հավաքվածներից որեւէ մեկը: Ոմանք նույնիսկ մտավախություն ունեցան, որ շատերն անգամ կդիմեն ծայրահեղ քայլի՝ հրաժարվելով ՀՀ անձնագրից:

Սերոբ ՄԱՐՈՒԹՅԱՆ