Ոնց որ սրտով չեք հանում, ցանկանալով չեք հանում․ վարչապետը՝ փոխոստիկանապետին

Այսօրվա կառավարության նիստի ժամանակ փոխոստիկանապետ Վարդան Եղիազարյանը ներկայացրեց ոստիկանության բարեփոխումների շրջանակներում իրականացվող մի շարք քայլեր: Կարեն Կարապետյանի հարցին` ի՞նչ է փոխվելու քաղաքացիների համար, Եղիազարյանը պատասխանեց, որ թեթևացնւմ են վարչական բեռը, դյուրացնում են բոլոր փողոցային երթևեկության կանոններն այնտեղ, որտեղ հնարավոր է դա իրականացնել. «Տրանսպորտային հոսքերն ենք ավելի հստակ վերահսկում, օպերատիվ առումով փոփոխություններ ենք իրականացնում»:

Վարչապետը փորձեց հասկանալ` վարչական բեռը որ ասում են թեթևացնում են, ի՞նչ նկատի ունեն, Եղիազարյանն ասաց, որ նախկինում, երբ չվճարված տուգանքների վրա 50 տոկոս տույժ էր ավելացվում, հիմա այդ տույժի չափը նվազեցվում է երկու անգամ, այսինքն՝ դառնում է 25 տոկոս:

«Նվազեցնու՞մ ենք, թե՞՝ հանում»,- ճշտող հարց ուղղեց վարչապետը: Փոխոստիկանապետը պատասխանեց, որ նվազեցնում են երկու անգամ: «Թե՞՝ հանում ենք. մեր քաղաքացիներին դա է հետաքրքրում, որ դուք տուգանքների տույժերը հանում եք»,- պնդեց վարչապետը։
Եղիազարյանը, ի վերջո,  նկատեց, որ տույժերը հանվում են: Վարչապետն էլ արձագանքեց` «ոնց որ սրտով չեք հանում, ցանկանալով չեք հանում, պարոն Եղիազարյան»։ Վերջում Կարեն Կարապետյանը կոչ արեց ոստիկանությանը բաց եւ թափանցիկ իրազեկել քաղաքացիներին։