«Օրենքով գող» Մարսոյի սպանությունից հետո կլինի՞ քրեական շրջանակների վերադասավորում

Արարատի և Վայոց Ձորի մարզերի առաջին ատյանի դատարանում, ամբաստանյալի աթոռին է հայտնվել 2009-ի հունիսի 19-ին իր տան դիմաց սպանված «օրենքով գող», «Մարսո» մականվամբ հայտնի Մարզպետունի Պետրոսյանի որդին` Գոռ Պետրոսյանը: Վերջինս իր ընկերների հետ միասին մեղադրվում է զենքի կամ որպես զենք օգտագործվող առարկաների գործադրմամբ խուլիգանություն կատարելու մեջ:

Դեպքը տեղի է ունեցել 2012թ-ի սեպտեմբերի 2-ին: Ըստ մեղադրական եզրակացության, այդ օրը, ժամը 13.00-ի սահմաններում, Արարատի մարզի Վեդի քաղաքի բնակիչ Կարեն Սաֆարյանն իրենց շենքի բակում վիճաբանել է համաքաղաքացիներ, եղբայրներ Վահան և Վարուժան Սարգսյանների հետ: Այդ քաշքշուկից անմիջապես հետո Կարենին օգնության են շտապել նրա ընկերները`Ռուբեն Ավետիսյանը, Լևոն Նիկողոսյանը, Գոռ Պետրոսյանը, Ժորա Կարապետյանը և Հայկ Կարապետյանը: Նրանք գնացել են Վահան և Վարուժան Սարգսյան եղբայրների տան դիմաց, հայհոյանքներով դուրս կանչել նրանց և առանց որևէ բացատրության, պարզաբանման, ծեծի ենթարկել, իսկ աղմուկի վրա հավաքված քաղաքացիների ներկայությամբ հայհոյելուց, իրարանցում ու խառնաշփոթ ստեղծելուց զատ նաև քարեր են նետել նրանց ուղղությամբ: Որոնցից մեկն էլ, դիպել է «ծեծվող» եղբայրների մորը` Անահիտ Սարգսյանին և նրան դարձրել սույն գործով տուժող:

Սա դատարան հասած մեղադրանքն է. ուշագրավն այն է, որ տղաների նման բուռն ծեծկռտուքից հետո միայն մի կին է տուժող ճանաչվել, այն էլ` քարի հարվածից ստացած վնասվածքի պատճառով: Մինչդեռ, դեպքից 16 օր անց, մամուլով հայտարավել էր, որ վերոնշյալ միջադեպի ընթացքում նաև սառը զենք է կիրառվել, որից տուժել է Կարեն Սաֆարյանը. երկու կողմն էլ դիմել էր ոստիկանության քննչական գլխավոր վարչության Արարատի մարզի քննչական բաժնի Արարատի քննչական բաժանմունք:

Այդ օրը, ժամը 15:30-ի սահմաններում, Վեդի քաղաքի հիվանդանոցից ոստիկանությանն ահազանգել էին, որ կրծքավանդակի ձախ մասում թափանցող վերք ախտորոշմամբ, իրենց մոտ է տեղափոխվել Արարատյան 40 շենքի բնակիչ, 21-ամյա Կարեն Սաֆարյանը: Ու թեև վերջինս չէր հայտնել իրեն դանակահարողի անունը` նշելով, որ չի ճանաչում, այդուհանդերձ, ըստ մամուլի, փաստի առթիվ Կարեն Սաֆարյանի հորեղբոր որդուց`52-ամյա Գագիկ Սաֆարյանից հաղորդում էր ընդունվել:

Դրանից մոտ 1 ժամ անց, ոստիկաններին էր դիմել նաև 26-ամյա Վարուժան և 24-ամյա Վահան Սարգսյանների մայրը`Անահիտ Սարգսյանը, և հայտնել, որ Կարեն Սաֆարյանն է իր ընկերների հետ ծեծել ու մարմնական վնասվածքներ է հասցրել իր որդիներին:

Արարատցիները նաև պատմել էին,(որին մամուլը նույնպես անդրադարձել է), որ «Կեքս» մականվամբ Կարեն Սաֆարյանի թիկունքում նրա քեռի Հրաչն է` ՀՀ ՊՆ Վայոց Ձորի մարզի Եղեգանաձորի 8-րդ կայազորային դատախազության դատախազը, ում օգնությամբ Կարենը կարող է «ջրից չոր դուրս գալ»:

Ի դեպ, դատաքննական նյութերից պարզ է դառնում, որ սկզբում ամբաստանյալի աթոռին են հայտնվել Կարեն Սաֆարյանն ու Ռուբեն Ավետիսյանը, իսկ գործը եղել է դատավոր Արմեն Բեկթաշյանի վարույթում: Դատաքննության ընթացքում ամբաստանյալների թիվն ավելացել է ևս երեքով` ի հաշիվ «Կեքսի» ընկերների, սակայն հետո դատավորի`Երևանի Կենտրոն և Նորք-Մարաշ վարչական շրջանների ընդհանուր իրավասության դատարան տեղափոխվելուց հետո, գործի վարույթը վերսկսվել է դատավոր Գագ•իկ Սարգսյանի նախագահությամբ:

Այժմ «օրենքով գող» Մարսոյի որդին`Գոռ Պետրոսյանը, «Կեքսը», և սույն գործով անցնող նրանց ընկերները «Նուբարաշեն» ՔԿՀ-ի կալանավորներ են:

Հնարավոր է, որ այս միջադեպը Արարատի մարզում քրեական շրջանակների վերադասավորումների կամ ազդեցությունների ամրապնդման շարունակությունը լինի` «օրենքով գող» Մարսոյի սպանությունից հետո:

Է. Մարտիրոսյան