Որտե՞ղ է թաղված շան գլուխը Ավետիսյանների սպանության գործում...VIDEO

Ուղիղ 5 ամիս առաջ, այս օրը Գյումրիում կատարվեց սարսափելին… Գյումրիի ռուսական ռազմաբազայի զինծառայող Պերմյակով Վալերի Պավլովիչը չբացահայտված պայմաններում մտավ Ավետիսյանների տուն և արնախումի պես սպանեց վեց (յոթ ) հոգու:
Հարևանուհին 6։20 պայթյուն կամ կրակոց է լսել, մտածել է՝ թեթև երկրաշարժ է, երեխայի լաց է լսել: Բայց ոչ ոքի մտքով անցնել չէր կարող, որ կատարվել էր անդառնալին…
Ինչո՞ւ հենց Ավետիսյանները եղան Պերմյակովի զոհը, արդյո՞ք Պերմյակովը կստանա իրեն արժանի պատիժը, կատարեց արդյո՞ք Գևորգ Կոստանյանն իր «ՏՂԱՄԱՐԴՈՒ ԽՈՍՏՈՒՄԸ»: Այս և մի քանի այլ հարցերի պատասխանները ստանալու համար, Fnews.am-ը փորձեց ստանալ քաղաքագետ, ԱԺ նախկին պատգամավոր Ստյոպա Սաֆարյանի մեկնաբանությունը:

-Պարոն Սաֆարյան, ի՞նչ եք կարծում, ինչու այս 5 ամիսների ընթացքում ոչ մի դրական տեղաշարժ չեղավ Ավետիսյանների սպանության գործում:

-Ռուսական կողմը Պերմյակովի գործը պատահական չի վերցրել իր վրա: Դա միտումնավոր քայլ էր` նրանց կողմից: Նրանք , իհարկե նպատակ ունեն ավելի մեղմ պատիժ սահմանել, իսկ գործը մինչև վերջ չի բացահայտվի: Նրանք միտումնավոր դեմ գնացին ՀՀ-ի Սահմանադրությանը:

-Արդյո՞ք ռուսական կողմի դատարանի վճիռը կլինի արդար և անկողմնակալ:

-Դա բացառված է : Ախր Պերմյակովի արարքը պարզագույն հանցագործություն չէ: Մենք կարող ենք ենթադրել, որ Ռուսաստանը հաշվետու չէ իր արարքների համար հայ հասարակության առաջ, բայց նա անում է այնպես, ինչպես իրեն է ձեռնտու:

-Ի՞նչ եք կարծում, արդյո՞ք Գևորգ կոստանյանը կատարեց իր « ՏՂԱՄԱՐԴՈՒ ԽՈՍՏՈՒՄԸ»:

-Ես ասեմ, որ Գ. Կոստանյանի արարքներին նայում եմ որպես դատախազի արարքներ, ինձ համար միևնույն է` կին է դատախազը, թե տղամարդ, կարևորն այն է , որ գործի որպես դատախազ:
-Ի՞նչ եք կարծում, արդյո՞ք ժամանակը կօգնի մոռանալ կատարվածը:

-Ոչ, ոչ ոք դա երբեք չի մոռանա, մեր հիշողության մեջ եղածը միշտ թարմ կմնա և ցավալի:

-Արդյո՞ք Հայաստանն այդքան թույլ է , որ հեշտությամբ զիջեց Պերմյակովին ` Ռուսաստանին:

-Հայաստանը շատ թույլ է , Հայաստանն էլ, կառավարությունն էլ:

-Ինչպե՞ս հզորացնենք մեր երկիրը:

-Մի բան ասեմ.մի ժամանակ կառավարությունը գեղեցիկ դեկորացիա էր` կազմված գեղեցիկ աղջիկներով ու տղաներով ` բարձրագույնի դիպլոմներով: Իսկ հիմա լրիվ ուրիշ է , հիմա արդեն քրեա-օլիգարխիան է կառավարում երկիրը: Կապը միշտ կլինի կրիմինալի և քաղաքականության միջև:
Երկիրը հզորացնելը պարզունակ է երևում միայն առաջին հայացքից, դա շատ բարդ է : Անհրաժեշտ է համախմբված ժողովուրդ և լավ պլաններ:

Աննա  Առաքելյան