Ոստիկանությունը պարզել է իրավապաշտպան Զարուհի Հովհաննիսյանին սպառնացած «ֆեյքի» ինքնությունը

Իրավապաշտպան Զարուհի Հովհաննիսյանին ու նրա ընտանիքի անդամներին Facebook սոցիալական ցանցում սպառնալիքներ տված անձի ինքնությունը պարզվել է:

Ոստիկանությունից տեղեկացնում են, որ հունվարի 5-ին, ժամը 16-ին, 42-ամյա մի կնոջից ոստիկանության կազմակերպված հանցավորության դեմ պայքարի գլխավոր վարչությունում հաղորդում էր ստացվել, որ facebook.com սոցիալական ցանցում Andre Makarov տվյալներով հանդես եկած անհայտ օգտատերը հունվարի 4-ին իր անհատական էջին է ուղարկել հաղորդագրություններ, որոնք պարունակում են նրա և որդու կյանքին ու առողջությանն ուղղված սպառնալիքներ:

Ձեռնարկված միջոցառումների արդյունքում՝ հունվարի 7-ին, ժամը 11.25-ին, ոստիկանության ԿՀԴՊ գլխավոր վարչություն է ներկայացել 1994 թ. ծնված Անդրանիկ Ա.-ն: Նա հայտնել է, որ www.facebook.com սոցիալական ցանցում Andre Makarov տվյալներով անհատական էջը պատկանում է իրեն և ինքը www.police.am կայքէջում տեղադրված հաղորդագրությունից տեղեկանալով, որ ոստիկանությունը փնտրում է տվյալ օգտատիրոջը՝ ներկայացել է ԿՀԴՊ Գլխավոր վարչություն:

Անդրանիկ Հ.-ն հայտնել է, որ խնդրո առարկա հաղորդագրությունները Զարուհի Հ.-ի անհատական էջին ուղարկել է ինքը:

Ավելի վաղ Զարուհի Հովհաննիսյանը իր էջում տեղադրել էր անհայտ օգտատիրոջ հետ իրենց նամակագրության լուսանկարը և հայտարարել էր. «Հիմա ես դիմում եմ իրավապահ մարմիններին, իմ և երեխաներիս հասցեին հնչեցված ակնհայտ սպառնալիքների վերաբերյալ ներկայացնելով հաղորդում հանցագործության մասին: ՖԲ-ում Անդրե Մակարով անունով գրանցված անձն ինձ գրում է բառացիորեն հետևյալը, -"...Ու տնից դուր գալուց կողքերտ նայի, զգուշ էղի ես երկու օրը, չսպանեն հանկարծ երեխուտ հետ" : Եթե այս Անդրե Մակարով կոչվածը չի աշխատում հենց նույն համակարգի դրդմամբ՝ կեղծ անվան տակ, ուրեմն գտեք ու պատասխանատվության ենթարկեք նրան, մեկ էլ զգուշացնում եմ այդ անձին, որ երեխեքիցս յուրաքանչյուրի գլխից մի մազ պակասի, կորած եք....»: