Ո՞վ և ինչու՞ է ՛՛պայթեցնում՛՛ ՛՛Արմենիան մոլիբդեն փրոդաքշնը՛՛

Երեկ՝ մարտի 6-ին, ժամը 06.30-ին ահազանգ էր ստացվել ԱԻՆ, որ Երևանի Արին-Բերդի փողոցում գտնվող պղնձամոլիբդենային գործարանում տեղի է ունեցել կոմպրեսատորի պայթյուն՝ հրդեհի բռնկմամբ:

Պարզվել էր, որ հրդեհը բռնկվել է Արին-Բերդի փողոցի թիվ 4 հասցեում գտնվող ՛՛Արմենիա Մոլիբդեն Փրոդաքշն՛՛ ՍՊԸ-ին պատկանող գործարանի կոմպրեսորային արտադրամասում և մոտակա բարձրավոլտ էլ. ենթակայանում:

Հրդեհը մեկուսացվել էր ժամը 07.03-ին, մարվել` 07.09-ին: 300 քմ տարածքում այրվել էին 10 կոմպրեսատորային շարժիչներ, 8 էլեկտրական կառավարման վահանակ և հաստոցի միացման համակարգը` խողովակաշարերով և հաղորդալարերով(100 գմ):

Նկատենք, որ այս ընկերությունում նախկինում էլ է նման պայթյուն եղել, որից լրջորեն տուժողներ են եղել, իսկ ՛՛Նաիրիտ՛՛ գործարանում տեղի ունեցած պայթյունը մարդկանց կյանքեր էր խլել:

Նման դեպքերի շարունակականությունը կարծես հուշում է, որ վերոնշյալ ընկերությունների տերերն ու պատասխանատուները հարստանում են ուրիշի կյանքն ու առողջությունը վտանգելու հաշվին:

Հիշենք 2012-ի դժբախտ դեպքը նույն այդ ընկերությունում, որտեղ փաստորեն ոչինչ չի փոխվել պատասխանատվության առումով: Կրկին պայթյունը վաղ առավոտյան էր եղել՝ գրեթե նույն ժամին: Հարց է առաջանում՝ արդյո՞ք անվտանգության կանոնները միտումնավոր չեն խախտվել..

Սկանդալային բացահայտումներ ՛՛Արմենիան մոլիբդեն փրոդաքշնի՛՛գործով

19:12 Ապրիլ 25, 2012

Ապրիլի 24-ի առավոտյան` ժ. 5:56-ին, տեղեկություն է ստացվել, որ 5:30-ի սահմաններում պայթյուն է տեղի ունեցել ՛՛Արմենիան մոլիբդեն փրոդաքշն՛՛ ընկերության արտադրական տարածքում: Դեպքի վայր են մեկնել ՀՀ ԱԻՆ ճգնաժամային կառավարման կենտրոնի օպերատիվ խումբը, Տեխնիկական անվտանգության ազգային կենտրոնի Երևանի ծառայության պետը և այլ պաշտոնյաներ: Թեև մի շարք անձինք տարբեր աստիճանի այրվածքներ են ստացել, սակայն պայթյունի հետևանքով, բարեբախտաբար, հրդեհ չի բռնկվել: Այրվածքներ ստացած աշխատակիցներից մի քանիսը տեղափոխվել է ՛՛Ճառագայթային բժշկության և այրվածքների գիտական կենտրոն՛՛ ՓԲԸ:

Առավոտվա դրությամբ հոսպիտալացված էին 8 հոգի` Վարազդատ Հակոբյանը, Արսեն Մուրադյանը, Արմեն Կարապետյանը, Հարություն Սահակյանը, Ռոբերտ Հարությունյանը, Մելիք Կարապետյանը, Սևադա Մեսրոպյանը, Ազատ Սուլուգյանը: Նրանցից 7-ը ՛՛Արմենի անմոլիբդեն փրոդաքշնի՛՛ աշխատակիցներ են, մեկը` Արսեն Մուրադյանը, ՛՛ԱՐՄՈԲԻԼ՛՛ անվտանգության ծառայության աշխատակիցն է, որը պահակային կամ անվտանգության ծառայություն է իրականացնում ՛՛Արմենիան մոլիբդեն փրոդաքշնում՛՛:

- Արսեն Մուրադյանը պայթյունի ժամանակ ձուլարանից դուրս է եղել, այնտեղ ՛՛պոստ՛՛ ունենք, գիշերային ծառայություն որ իրականացնում են, այնտեղ է գտնվել,- մեզ հետ զրույցում ասաց ՛՛ԱՐՄՈԲԻԼ՛՛ ծառայության անվտանգության պահնորդային ծառայության ղեկավար Խաչիկ Կարապետյանը: - Պայթյունի ալիքը դարպասը, ապակիները դուրս է շպրտել, բարեբախտաբար, մեր աշխատողը դարպասի հետևում չի եղել, այլ` մի քիչ այն կողմ: Նա գլխի հատվածում ապակու բեկորներից վնասվածքներ է ստացել, մեկ էլ մատն է վնասել: Այրվածք չունի, մատն արդեն վիրահատել են ՛՛Արմենիա՛՛ բժշկական կենտրոնի միկրովիրաբուժության բաժանմունքում:

Տեղեկացնենք, որ ՛՛Ճառագայթային բժշկության և այրվածքների գիտական կենտրոն՛՛ ՓԲԸ տեղափոխված 4 անձանցից 2-ի վիճակը ծանր է, նրանք հիշյալ կենտրոնի վերակենդանացման բաժանմունքում էին: 2-ի վիճակը միջին ծանրության է: Նախնական տեղեկություններով` բոլորի մոտ առկա են 2-4-րդ աստիճանի այրվածներ: Վերոնշյալ բուժհաստատությունից Panorama.am-ին տեղեկացրել են, որ ՛՛այրվածքները խորն են, նրանց մոտ ախտորոշվել է նաև այրման արգասիքներով թունավորում՛՛:

- Տեղի է ունեցել տեխնոլոգիական գործընթացի խախտում, որի հետևանքով պայթյուն է առաջացել, պատճառները պարզելու համար հիմա փորձաքննություն է իրականացվում,- մեզ հետ զրույցում ասաց ՀՀ տեխնիկական անվտանգության ազգային կենտրոնի Երևան քաղաքի ծառայության պետ Վլադիմիր Հովսեփյանը:

Տեղազննությամբ արդեն իսկ պարզ է դարձել, որ ֆերոմոլիբդենի արտադրության արտադրամասի խառնիչում տեղի է ունեցել պայթյուն, ինչի հետևանքով փլուզվել է արտադրամասի պատը` մոտ 4 քմ մակերեսով, կարճ միացումից այրվել է մոտ 4 գծամետր մալուխ: Հրդեհը մարվել է տեղի ուժերով: ՀՀ արտակարգ իրավիճակների նախարարության (ԱԻՆ) տեղեկացմամբ` ՛՛911՛՛ ծառայությունը հրդեհի և փլուզման մասին ահազանգ չի ստացել:

Չնայած այն բանին, որ դեպքի վայր է ժամանել նաև ՀՀ ոստիկանության Էրեբունու բաժնի օպերատիվ խումբը` ոստիկանության Էրեբունի բաժնի պետի գլխավորությամբ, Tert.am-ի տեղեկացմամբ` ՛՛գործարանի անվտանգության աշխատակիցները մի պահ թույլ չէին տալիս, որ ոստիկանության և ԱԻՆ-ի աշխատակիցները մտնեին տարածք` պատճառաբանելով, թե մասնավոր տարածք է: Սակայն բանակցությունների արդյունքում հաջողվեց նրանց մուտքը գործարանի տարածք՛՛:

Պատկերացնո՞ւմ եք` թույլ չեն տվել նաև ոստիկանության աշխատակիցներին` հաշվի չառնելով նույնիսկ հիշյալ բաժնի պետի ներկայությունը: ՛՛Ախրանան՛՛ իրեն երևի հանրապետության նախագահի, ոստիկանապետի կամ առնվազն ոստիկանության Երևան քաղաքի վարչության պետի պաշտոնում է երևակայել: Եթե սա ինքնիրավչություն չէ ու բխում է ընկերության տնօրինության ընդհանուր վերաբերմունքից, այսպես ասած, արտաքին աշխարհի նկատմամբ վարվող քաղաքականությունից, ապա տեղի ունեցած պայթյունի պատճառները, կարծում ենք, նաև այդտեղ պետք է փնտրել:

2003 թ. հիմնադրված ՛՛Արմենիան մոլիբդեն փրոդաքշն՛՛ ՍՊԸ-ն գտնվում է Երևանի Էրեբունի վարչական շրջանի Արին-բերդի փողոցի 3/6 հասցեում, հիմնականում զբաղվում է ֆերոմոլիբդենի արտադրությամբ: Ձեռնարկությունում աշխատում է մի քանի հարյուր մարդ: Ըստ ընկերության` իրենց կենտրոնական լաբորատորիան հագեցված է ամենաժամանակակից, նորագույն սարքավորումներով: Ավելին. վերոնշյալ ՍՊԸ-ի ղեկավարությունը մինչ երեկվա դեպքը փորձում էր հավատացնել, թե ՛՛հատուկ ուշադրություն է դարձվում աշխատողների անվտանգության, առողջության և սանիտարահիգիենիկ պայմանների բարելավմանը՛՛: Հիմա թերևս արդեն պարզ է, թե անվտանգությանն ինչպիսի ուշադրություն է դարձվում:

Ըստ նույն ընկերության տնօրեն և հիմնադիր Կարեն Կարապետյանի` ՛՛վերջին երեք տարիների ընթացքում բարեգործական նպատակներով կատարվել են ծախսումներ շուրջ 1 մլն. դոլարի չափով, որոնք ուղղվել են կրթությանը, գիտությանը, արվեստին և տարբեր հիմնադրամներին՛՛: Կարծում ենք, ավելի ճիշտ կլիներ այդ գումարներն ուղղել ընկերությունում պատշաճ անվտանգությունն ապահովելուն: Հիշեցնենք, որ ուղիղ մեկ տարի առաջ` 2011 թ. ապրիլին, ՀՀ նախագահ Սերժ Սարգսյանն այցելել էր «Արմենիան մոլիբդեն փրոդաքշն՛՛ ընկերություն: ՛՛Մենք պետք է փորձենք օգտագործել բոլոր հնարավոր միջոցները, որպեսզի կարողանանք անկեղծորեն իրար հետ խոսել, քննարկել խնդիրները՛՛,- ասել էր հանրապետության ղեկավարը:

- Այդ ընկերությունը մի քանի տարի է, ինչ մեզ մոտ փորձաքննություն չի անցել, մասնավոր ընկերություններում է անցել, իրենք գիտեն, թե ինչպես,- մեզ հետ զրույցում ասաց ՀՀ տեխնիկական անվտանգության ազգային կենտրոնի տնօրեն, գեներալ-մայոր Աշոտ Պետրոսյանը:- Այդ դեպքի մասին ինձ ժամը 6:30-ին են ասել, ուղարկել եմ կենտրոնի փորձագետներին, գնացել նկարել են, ամեն ինչն էլ նկարներով կա, խախտումներ են եղել, տեխնիկական անվտանգության կանոնակարգերի խախտումներ էլ են եղել:

Մեզ ընկերությունից հաջողվեց տեղեկանալ, որ ՛՛Արմենիան մոլիբդեն փրոդաքշնը՛՛ վերջին տարիներին, համենայն դեպս 2011 թ., փորձաքննության է ենթարկվել ՛՛ԴԱՄԻ՛՛ ՍՊԸ-ի կողմից, որի տնօրեն Դավիթ Աշոտի Սարգսյանը, ի դեպ, ՀՀ վարչապետ Տիգրան Սարգսյանի եղբորորդին է:

lakmoes.am