Ով կվճարի բուժման ծախսերը

Դերասան Վարդան Պետրոսյանի պաշտպան Նիկոլայ Բաղդասարյանը Fnews.am-ի հետ զրույցում տեղեկացրեց, որ հունվարի 18-ին լինելու է դերասանի հերթական դատական նիստը: Տուժող կողմի ներկայացուցիչները պահանջում են, որ Վարդանը հատուցի պատճառած վնասները, դրանք են՝ փաստաբանների վճարած գումարներն ամբողջությամբ և մյուս անձանց պատճառած վնասները բուժման մասով գումարը չի գերազանցում մեկ միլիոն դրամը, իսկ փաստաբանի ծախսը՝ երկու միլիոնը:
Դերասանի փաստաբան Նիկոլայ Բաղդասարյանը տեղեկացրեց, որ իրենք չպետք է գումարը փոխանցեն, այլ ապահովագրական ընկերությունը։ «Տուժող կողմը պետք է դիմի ապահովագրական ընկերությանը, նրանք եռամսյա ժամկետում կստանան փոխհատուցում։ Այն մասով, որը հնարավոր է մերժի ապահովագրական ընկերությունը, Վարդան Պետրոսյանը պատրաստ է վճարել, նույնիսկ ես վստահ եմ՝ մի բան էլ ավել կվճարի: Մեր պնդումն այն է, որ ավտովթարների հետևանքով ստացիոնար բուժման գումարները, որոնք կատարվել են և ապագայում պիտի կատարվեն, հատուցվում են ապահովագրական ընկերությունների կողմից, այլ ոչ թե վարորդն է հատուցում: Հիմա այդ գործընթացի մեջ ենք, տեսնենք` ուր կհասնենք, որից հետո նոր կնախաձեռնենք հաջորդ քայլերը» ,-ասաց փաստաբանը:

Հիշեցնենք, որ հայտնի դերասանն անազատության մեջ է 2013թ. նոյեմբերից՝ նույն տարվա հոկտեմբերի 20-ին Երևան-Եղվարդ ավտոճանապարհին տեղի ունեցած ավտովթարի գործով, ինչ հետևանքով զոհվել էին հորեղբոր որդիներ Էդգար և Էդուարդ Հակոբյանները, իսկ նրանց քույրը` Տաթև Հակոբյանը ստացել էր մարմնական վնասվածքներ:

Հիշեցնենք, որ Կոտայքի մարզի ընդհանուր իրավասության դատարանը սեպտեմբերի 2-ին որոշում էր կայացրել 2015 թ. հունվարի 29-ին 5 տարվա ազատազրկման դատապարտված Վարդան Պետրոսյանի պատիժը բաց ռեժիմով կրելու մասին և դերասանը շարունակում է այն կրել գաղութում, որտեղ պատիժը կրում են անզգուշությամբ հանցագործություն կատարած անձինք: Նաև հայտնի է, որ այս ընթացքում դերասանը աշխատում է Վազգեն Սարգսյան 7 հասցեում գտնվող «Օվացիա» պրոդյուսերական կենտրոնում, քանի որ բաց տիպի ՔԿՀ-ի կալանավորը կարող է առավոտյան 08:00-ին գնալ աշխատանքի և երեկոյան 20:00-ին վերադառնալ ՔԿՀ: