Փաստաբան Արշավիր Խալափյանը մեղադրվում է առեւտրային կաշառք ստանալու մեջ. Գործը դատարանում է

Փաստինֆոն գրում է. Առևտրային կաշառքի մեջ մեղադրվող փաստաբան Արշավիր Խալափյանի գործն ուղարկվել է դատարան:

Ինչպես ավելի վաղ տեղեկացրել ենք, դատարանը բավարարել էր նախաքննական մարմնի միջնորդությունը և փաստաբան Արշավիր Խալափյանի նկատմամբ որպես խափանման միջոց ընտրել կալանավորումը, սակայն միաժամանակ սահմանել էր մեկ մլն դրամի գրավի դիմաց նրան ազատ արձակելու հնարավորություն:

Ըստ մեղադրանքի՝ Արշավիր Խալափյանը՝ որպես փաստաբան, ստանձնելով Սյունիքի մարզի բնակիչներ Հ.Մարգարյանի ու Է.Կարապետյանի շահերի պաշտպանությունը, վերջիններիս ենթադրյալ իրավունքների խախտման կապակցությամբ հաղորդում է ներկայացրել իրավապահ մարմիններին` համայնքի «Հին գերեզմաններ» կոչվող վայրում համայնքի ղեկավար Սամվել Սարգսյանի կողմից գերեզմանատեղեր ապօրինի հատկացնելու վերաբերյալ, որի հիման վրա հարուցվել է քրեական գործը:

Այնուհետև Խալափյանը նշված քրեական գործի նախաքննության ընթացքում` 2014թ-ի մարտին, Կապանի «Դարիստ» հյուրանոցային համալիրում հանդիպել է Ս.Սարգսյանի որդուն` Սարմեն Սարգսյանին և ի վնաս նրա հոր գործողություններ չկատարելու` նոր բողոքներ չներկայացնելու, ինչպես նաև իր վստահորդներին մոլորության մեջ գցելու եղանակով, նախկինում ներկայացված դիմումների ընթացքով չհետաքրքրվելու պայմանով, Սարմեն Սարգսյանից ապօրինի պահանջել է 10.000 ԱՄՆ դոլար:

Բացի այդ, ըստ նախաքննության՝ Արշավիր Խալափյանը՝ որպես Կապան քաղաքի Ռ.Մինասյան փողոցի 17շենքի բնակիչ, 07-04-2014թ գրավոր դիմել է Կապանի քաղաքապետարան` Աշոտ Կույումջյանի կողմից նշված հասցեին հարակից տարածքում ապօրինի շինարարություն կատարելու վերաբերյալ համապատասխան տեղեկատվություն ստանալու համար, իսկ 18-04-2014թ-ին՝ որպես ՀՀ Փաստաբանների պալատի փաստաբան, «Հայաստանի երիտասարդ իրավաբանների ասոցիացիա» ՀԿ Սյունիքի մարզային մասնաճյուղի նախագահ և Սյունիքի հակակոռուպցիոն կենտրոնի համակարգող, դարձյալ նույն նպատակով հերթական դիմումն է ներկայացրել քաղաքապետարան, որից հետո 2014թ. մայիսի 1-ին վերոհիշյալ հյուրանոցային համալիրի սենյակներից մեկում հանդիպել է Ա.Կույումջյանին ու իր կողմից ներկայացված դիմումների ընթացքի վերաբերյալ գործողություններ չկատարելու, այն է` հետևողականություն չցուցաբերելու, նոր դիմումներ չներկայացնելու համար Աշոտ Կույումջյանից՝ որպես կաշառք, ապօրինի պահանջել է 1500 ԱՄՆ դոլար:

Արշավիր Խալափյանին մեղադրանք է առաջադրվել ՀՀ քրեական օրենսգրքի 200-րդ հոդվածի 3-րդ մասով: