Պոլիտեխնիկում կրքերը թեժանում են. նախկին ու ներկա ռեկտորները հանուն հաղթանակի պատրաստ են ամեն ինչի

1in.am-ը գրում է. Երևանի ճարտարագիտական համալսարանում ռեկտորի ընտրապայքարը ընթանում է գրեթե Աբովյանի քաղաքապետի ընտրությունների պես՝ թեժ, որտեղ կա իշխանության դրածո և իշխանության շարքերից բոլորովին վերջերս վտարված թեկնածու, ինչը կատաղի է դարձրել պայքարը: Իսկ ԵՊՀ-ում և բժշկական համալսարանում Արտաշատի պես՝ իշխանության միակ թեկնածուով:

Պոլիտեխնիկում այս կարգավիճակում միմյանց դեմ են պայքարում ներկայումս ռեկտորի ժամանակավոր պաշտոնակատար, ՀՀԿ-ական Հովհաննես Թոքմաջյանը, որը նաև Երևանի ավագանու ՀՀԿ խմբակցության անդամ է, և նախկին ռեկտոր, դաշնակցական Ոստանիկ Մարուխյանը: Վերջինիս իշխանությունն առաջադրել է, որ սեփական կուսակցի՝ Թոքմաջյանի պաշտոնանկությունը հնարավորինս արժանապատիվ կազմակերպի, որը մինչև այժմ ՀՀԿ-ում է:

Սա շատ լավ գիտակցելով՝ Հովհաննես Թոքմաջյանը չի հանձնվում, որոշել է մինչև վերջ պայքարել՝ չնայած արտաքին ուժերի աջակցության բացակայությանը: Գաղտնիք չէ, որ բուհերում ևս ռեկտորի ընտրությունները ընթանում են իշխանության թելադրանքով: Պոլիտեխնիկում իշխանությունը, արդեն նաև վարչապետ Հովիկ Աբրահամյանը, սատարում են Մարուխյանին:

Թոքմաջյանը մինչև Ղարաբաղ հասավ, սակայն այստեղ ես հանձն չառան իշխանությունների որոշման վրա ազդելու գործը: Թոքմաջյանի մերձավոր շրջապատից վստահեցնում են, թե Հովիկ Աբրահամյանը կուսակցին խոստացել էր ընտրվելու հարցը լուծել, բայց հետո նրա հոգում հաղթեց դաշնակցականների հետ բարեկամությունը, ինչը զրոյացրեց կուսակցի շանսերը: «Առաջին լրատվական»-ի հետ զրույցում պոլիտեխնիկցիները պատմեցին՝ Թոքմաջյանը չի հանձնվում և փորձում է «քարոզարշավը» բարձրակետին հասցնել կոլեկտիվում և շարունակում է հուսալ, որ ընտրության օրը նրանք իր կողքին կկանգնեն և, սպասումներին հակառակ, մեծամասնությունը իր օգտին կքվեարկի:

Բայց այստեղ էլ մի բայց կա.: Բանն այն է, որ Թոքմաջյանը ժ/պ նշանակվելուց հետո լծվել էր բարեփոխումների իրականացմանը՝ կադրային, կառուցվածքային փոփոխությունների, ինչը նրա դեմ բողոքի ալիք է բարձրացրել: Ոմանք հիմա ընտրությունները դիտարկում են հաշվեհարդարի պատեհ առիթ: Չնայած որ այդպիսիների թվում շատերը չեն ժխտում, որ Թոքմաջյանն իսկապես աշխատել և արել է ամեն ինչ Պոլիտեխնիկի հեղինակությունը բարձրացնելու և հաջողություններ ունենալու համար, սակայն խիստ կասկածում են, որ դասախոսական կազմը, հանուն բուհի հաջողությունների, նրա կողքին կլինի: Սերժ Սարգսյանի մակարդակով ամեն ինչ ասված է, և դժվար թե գտնվեն համարձակներ, ովքեր գործող ռեկտորի կատարած աշխատանքի օգտին կքվեարկեն:

մանրամասները` սկզբնաղբյուրում