Փողը բաժանելու են ընտրությունից 2 օր առաջ, որ «ստավկաները» չբարձրանան

Lragir.am-ը գրում  է.
Լոռու մարզի Սպիտակ քաղաքում շրջանառվող տեղեկությունների համաձայն՝ խորհրդարանական ընտրություններից մի քանի օր առաջ այստեղ մարդկանց ընտրակաշառք է բաժանվելու:
Սպիտակցիները Lragir.am-ի հետ զրույցում ասացին, որ տեղեկություն ունեն, որ գումարներ են բաժանվելու հիմնականում ՀՀԿ-ի ու ԲՀԿ-ի կողմից, բայց ոչ հիմա: Ըստ նրանց՝ ընտրակաշառքը բաժանելու են ընտրություններից մեկ կամ երկու օր առաջ, որպեսզի գումար բաժանողների միջև մրցակցություն չլինի, և «ստավկաները» չբարձրանան:
Սպիտակցիների հայտնած տեղեկության համաձայն՝ արդեն հստակ է, որ ԲՀԿ-ն այստեղ ընտրակաշառք է բաժանելու: Մարտի 10-ին Սպիտակում քարոզարշավ է անցկացրել Ծառուկյան դաշինքի և ԲՀԿ ղեկավար Գագիկ Ծառուկյանը: Մարդիկ պատմում են, որ ոմանք տեսել են, թե ինչպես են հենց այդ օրը Ծառուկյան դաշինքի Լոռու մարզային անդամները փոխանակման կետում մեծ քանակությամբ դոլար փոխանակել դրամով:
«Ասում են՝ դոլարները մանրել են, որ ընտրակաշառք տան», պատմեցին սպիտակցիները:
ԲՀԿ-ից այստեղ ռեյտինգային ընտրակարգով առաջադրված ֆավորիտ թեկնածուն նախկին քաղաքապետ Վանիկ Ասատրյանն է, ով հայտնի է «Հավ» մականունով:
Սպիտակի քաղաքապետ Գագիկ Սահակյանը ՀՀԿ ռեյտինգային թեկնածուներից սատարելու է ԱԺ ՀՀԿ-ական պատգամավոր Արկադի Համբարձումյանին (Դերժավայի Արկադ):
Լոռու մարզում ՀՀԿ-ն ընդհանուր ունի ռեյտինգային ընտրակարգով առաջադրված 6 թեկնածու, որոնցից երեքն են միմյանց հետ թեժ մրցակցության մեջ: Նրանք են Արկադի Համբարձումյանը, ԱԺ ՀՀԿ խմբակցության ղեկավար Վահրամ Բաղդասարյանը և ՀՀԿ-ական պատգամավոր Կարեն Կարապետյանը, ով վերջին շրջանում բավական կոշտ գնահատականներ էր հնչեցրել ՀՀԿ-ի հասցեին:
Սպիտակի քաղաքապետ Գագիկ Սահակյանը Lragir.am-ի հարցին ի պատասխան ասաց, որ այս փուլում մարդկանց խոստում տալիս են, բայց ընտրակաշառք՝ ոչ: Նա ասաց, որ կոնկրետ իր սատարած թեկնածուի դեպքում գումար չունեն, որ ընտրակաշառք առաջարկեն:
«Խոստումը կաշա՞ռք է, խոստումն այն խոսքն է, որը պետք է իրականություն դառնա», նշեց քաղաքապետը:
Սահակյանը նաև հավելեց, որ վստահ է՝ եթե արդար ընտրություններ լինեն, ՀՀԿ-ն մարզում կհաղթի: Չնայած հիշեցրեց, որ 2013 թվականի նախագահական ընտրություններում կոնկրետ Սպիտակում Սերժ Սարգսյանը պարտություն էր կրել: