Քաղաքացին գումարի դիմաց լրտեսել է մարդկանց եւ տվյալներ հավաքագրել. Գործն ուղարկվել է ՀՔԾ

Քաղաքացի Արմեն Ա.-ն մասնավոր խուզարկուի ծառայություններ մատուցելու եւ դրա դիմաց գումար ստանալու նպատակով, հայտարարություն է տարածել համացանցային կայքերում, որի արդյունքում՝ տարբեր անձանցից որոշակի վարձատրության դիմաց, 2015 թվականի ապրիլից հունիսն ընկած ժամանակահատվածում, շահագրգիռ քաղաքացիներին մատուցել է մասնավոր խուզարկուի ծառայություններ: Այդ կերպ՝ քաղաքացի Արմեն Ա.-ն, տեխնիկական սարքավորումների օգտագործմամբ, տարբեր անձանց անձնական կյանքի մասին, առանց վերջիններիս համաձայնության, հավաքել եւ պատվիրատուներին փոխանցել է ապօրինի տեղեկություններ:

ՀՔԾ-ից հայտնում են, որ անձնական կյանքի մասին տեղեկություններ ապօրինի հավաքելու, պահելու եւ օգտագործելու դեպքի առթիվ ՀՀ ԱԱԾ քննչական վարչությունում ՀՀ քրեական օրենսգրքի 144-րդ հոդվածի 1-ին մասի հատկանիշներով հարուցված քրեական գործը նույն օրը ՀՀ քրեական դատավարության օրենսգրքի 190-րդ հոդվածի կարգով` ըստ քննչական ենթակայության ուղարկվել է ՀՀ քննչական կոմիտեի Երեւան քաղաքի քննչական վարչություն, որտեղ տեւական ժամանակ կատարվել է նախաքննություն:

Հետագայում գործի փաստական հանգամանքներով պայմանավորված՝ լրիվ, օբյեկտիվ եւ բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկվել ՀՀ հատուկ քննչական ծառայություն:

Նախաքննությունը շարունակվում է: