Քաղաքապետ ընտրվում է նա, ում ընտրում է ժողովուրդը

Լոռվա մարզի Ստեփանավան քաղաքն այսօր կարելի է ասել, որ հանրապետության առաջատար քաղաքներից մեկն է.զարգացած ենթակառուցվածքներով, բարեկարգ ու լուսավոր փողոցներով։ Ինչպես նաեւ չի կարելի անտեսել քաղաքում ստեղծված առկա բարոյա-հոգեբանական մթնոլորտը, որում ինչ խոսք իր լուման ունի քաղաքապետ Միքայել Ղարաքեշիշյանը:

Ստեփանավանի ու ստեփանավանցու հոգսերով ապրող քաղաքապետը, շատերն են մատնանշում, որ քաղաքապետ ընտրվելու առաջին իսկ օրվանից հնարովորինս փորձել է բոլոր խնդիրներին արագ եւ օպերատիվ լուծում տալ:

Ինչպես նշում են Ստեփանավանի բնակիչներից շատերը. «Այսօր Ստեփանավան քաղաքը կերպարանափոխվել է, կարծես թե երիտասարդացել:Կարելի է ասել, որ տարեցտարի քաղաք այցելած զբոսաշրջիկների թիվն էլ որոշակի ավելացել է: Փողոցների բարեկարգում, գիշերային լուսավորություն, կանաչապատում: Փոփոխությունները թվարկելու փոխարեն կարելի է մեկ անգամ այցելել Ստեփանավան եւ փոփոխություններն անմիջապես աչքի կընկնեն: Քաղաքում շարժն աշխուժացել է, նախորդ ընտրություններից հետո էլ, այստեղ բարոյահոգեբանական մթնոլորտը բավականին փոխվել է, քաղաքն ազատ շնչում է»:

Տաղավարում նարդի խաղացող տղամարդիկ խաղով տարված ու ոգեւորված պատմում էին իրենց քաղաքում տեղի ունեցած փոփոխություններից ու անկեծորեն նշում.
«Մի Միշա՝ մի Լոռի, գնացեք, ամեն մեկիդ սենց քաղաքապետ ենք ցանկանում, էսօր մարզի թիվ մեկ քաղաքն ա դառնում Ստեփանավանը, մարդը խոսք տվավ ու արավ:Եթե չհաշվենքմի քանի ծանոթ-մանոթի 30-40 ձեն, որ անցած ընտրություններում տվեցին մյուս թեկնածուներին, ամբողջ քաղաքը մի մարդու պես կանգնել են Ղարաքեշիշյանի կողքին ու ձեն տվել նրան: Մեծի հետ մեծ ա, փոքրի հետ՝ փոքր: Էնենց տպավորություն ա, որ էս մարդը սաղ քաղաքի փոքրին ու մեծին ճանաչում ա:Սաղ կյանքը քյասիբների հետ ա աշխատել դրանիցն ա, սաղի հոգսին ծանոթ ա, նեղին հասել ա ու գիտի ով ինչի կարիք ունի»:

Քաղաքի բնակչուհիներից մեկն էլ մեզ հետ զրույցում նշեց, որ, հիմա քաղաքային իշխանությունները ձգտում են Ստեփանավանը դարձնել, իսկապես, տուրիստական քաղաք, ծրագրավորում են քաղաքում հյուրանոցային համալիրներ կառուցել, ստեղծել բոլոր պայմանները օտարերկրյա եւ տեղացի զբոսաշրջիկների ուշադրությունը դեպի իրենց քաղաքը հրավիրելու համար:

Իսկ թե ինչպես է գնահատում իր կառավարման տարիները Ստեփանավանի քաղաքապետ Միքայել Ղարաքեշիշյանը, եւ  թե ինչպիսի ծրագրեր ունի առաջիկայում, փորձեցինք պարզել հենց նրանից:

–Պարոն Ղարաքեշիշյան, հե՞շտ էր քաղաքապետի աթոռը ստանձնելը, եւ ինչքանո՞վ Ձեզ հաջողվեց իրականացնելու Ձեր առջեւ դրված խնդիրները:

-Շատերին կարող է թվալ , թե դա հեշտ աշխատանք է, ու խաղ ու պար, բայց դա իրականում  այդպես չէ: Նախ եւ առաջ, քաղաքապետ ընտրվում է նա, ում ընտրում է ժողովուրդը։ Իսկ դրանից հետո, ինչ խոսք, գալիս է մեծ պատասխանատվության պահը:

Նախկին քաղաքապետը, գիտեք իմ եղբայրն էր, ով այս քաղաքում նույնպես ներդրում է ունեցել իր աշխատած տարիներին։ 2012թ-ի սեպտեմբերի 9-ին ՏԻՄ ընտրություններին առաջադրեցի իմ թեկնածությունը, իսկ ընտրություններից մոտ 1,5 ամիս առաջ ընդգրկվեցի Հանրապետական կուսակցության շարքերը:
Ու հիմա էլ ես անկեղծ պիտի խոստովանեմ, որ քաղաքում բոլորին վերաբերում եմ իմ հարազատի պես:

–Ստեփանավանում այսօր գոյություն ունեցող ո՞ր հիմնախնդիրն եք համարում առավել կարևոր:

–Ամենամեծ խնդիրն այսօր արտագաղթն եմ համարում։ Ցավոք սրտի,  մեր երկրի առջեւ ծառացած բազում հիմնախնդիրների պատճառով, մեր հայրենակիցների մի մեծ բանակ տարիների ընթացքում բռնեց  արտագաղթի ճանապարհը, որի  համար կարծում եմ ցանկացած հայ պետք է մտահոգվի: 

-Ինչպես նկատեցինք քաղաքը առանձնանում է յուրահատուկ մաքրությամբ:Կարծես թե ոչինչ չի խնայվում քաղաքի մաքրությունը պահպանելու համար:

-Իսկապես, քաղաքի աղբահանության և սանիտարական մաքրության առումով Ստեփանավանում վերջին տարիների համեմատությամբ դրական փոփոխություն են արվել; Ստեփանավանն անցած տարի արժանացավ «ՀՀ լավագույն մաքուր քաղաք կոչմանը», ինչի համար մենք մեծ աշխատանք ենք իրականացրել։ Ամեն առավոտ «Ստեփանավանի կոմունալ տնտեություն» ԲԲԸ-ի աշխատակիցները մաքրում են քաղաքի փողոցները, որին հաջորդում է ավլվածքի հեռացման և աղբահանության աշխատանքները քաղաքի փողոցներից, բազմաբնակարան շենքերի ու անհատական տների բակերից, քաղաքի բոլոր թաղամասերից: Նախկինում աղբը փողոցում գցելը շատերն արդարացնւմ էին անհրաժեշտ քանակությամբ աղբարկղերի բացակայությամբ, սակայն միայն անցած տարի Ստեփանավանում` բազմաբնակարան շենքերի բակերում, փողոցներում ու պուրակներում, տեղադրվել ենք Ֆրանսիայի Դեսին քաղաքից բերված եվրոպական ստանդարտներին համապատասխան ավելի քան 400 աղբարկղ, 50 աղբարկղ էլ ձեռք է բերվել համայնքային բյուջեի միջոցներով: Քաղաքի սանիտարական մաքրությանը խստորեն հետևում եմ անձամբ :

-Պարոն Ղարաքեշիշյան, քաղաքում բավականին ակտիվ է մշակութային անցուդարձը, սպորտային կյանքը։ Կխնդրեի այս մասին առավել մանրամասն ներկայացնել ։

-Այն ամենն ինչ ստեղծում ենք ինքներս, մեզ շրջապատող աշխարհն է՝ մշակույթը։ Տարիների ընթացքում մշակութային շատ օջախների հետ խնդիրներ կային , որոնց շահագործումը մեծ գումարների հետ էր կապված։ Մեծ աշխատանքներ կատարեցինք մշակութային օջախների պահպանման գործում։ Քաղաքապետարանի ենթակայության տակ ունենք գրադարաներ, որոնք գործում են բնականոն հունով և տարեցտարի դրանք համալրվում են նոր գրքերով ու գրականությամբ։

Հիմնականում շատերի մոտ այն տպավորությունն է, թե Ստեփանավան քաղաքն այնքան մեծ բյուջե ունի, որ միանգամից կվերանորոգի ու այսօրվա ժամանակներին հարիր տեխնիկայով կապահովի գրադարանները։ Ցանկալի է, որ ունենանք նման հնարավորություններ, բայց մեր գերխնդիրը եղել է այդ գրադարանները պահպանելը, դեռ ավելին՝ պահում ենք աշխատողներին, բարձրացրել նրանց աշխատավարձերը և պահպանել ու ավելացրել գրքերի ֆոնդը։ Ճիշտ եք նկատել, մշակութային կյանքը մեզ մոտ ակտիվ է։

Ունենք մշակութային օջախներ, արվեստի, երաժշտական դպրոցներ։ Քաղաքապետարանի ենթակայությամբ գործում են մանկապարտեզներ, սպորտ-դպրոցներ։Ազգային բոլոր ծեսերի և ծիսակատարությունների, պետական ու եկեղեցական տոների առթիվ կազմակերպում ենք բազմաթիվ մշակութային և զանգվածային միջոցառումներ։ Մարզադպրոցներ հաճախող բոլոր սաների համար մարզումները կազմակերպվում են անվճար և պատահական չէ,որ այս բնագավառում ստեփանավանցիները գրանցել են բազմաթիվ հաջողություններ։ Մեր մարզիկները նշանակալի հաջողություններ են ունեցել շախմատի, ֆուտբոլի, ծանրամարտի, բազկամարտի տարբեր մրցաշարերում։

Աննա  Սարգսյան