Քոչարյանը գեներացնում է Ջրառատի միջադեպը

1in.am-ը գրում է .

Արմավիրի մարզի Ջրառատ գյուղում անցած կիրակի օրը տեղի ունեցած դեպքերի շուրջ զարգացումներն ու կրքերը թեժանում են: Հիշեցնենք, որ մարտի 12-ին «Օհանյան-Րաֆֆի-Օսկանյան» դաշինքը հայտարարել էր, որ Արմավիրի մարզի Ջրառատ գյուղի գյուղապետ, ՀՀԿ ներկայացուցիչ Սամվել Գալստյանը, ով փոխոստիկանապետ Լևոն Երանոսյանի բարեկամն է, սպառնալիքներ է հնչեցրել գյուղի բնակիչ իրենց համակրի նկատմամբ։

Իսկ երեքշաբթի օրն արդեն վիճաբանություն է տեղի ունեցել ՕՐՕ-ի համակրի և գյուղապետի միջև, որի ժամանակ վերջինիս բարեկամներից մեկի մոտ եղած հրազենից կրակ է արձակվել: Միջադեպի հետևանքով այս անգամ էլ վիրավորվել են երեք հոգի։ Երեքշաբթի երեկոյան ՕՐՕ դաշինքն այդ դեպքի վերաբերյալ հաղորդագրություն էր տարածել, որում մասնավորապես նշված է. «Մարտի 14-ին ՀՀԿ-ականները հրոսակային հարձակում են գործել 16-ամյա պատանու վրա, նրան դաժան ծեծի ենթարկել, պատճառելով մարմնական վնասվածքներ: Քիչ անց գյուղապետարանից անակնկալ հարձակման են ենթարկվել պատանուն օգնելու դուրս եկած նրա հարազատները: Այս անգամ նրանց դեմ կիրառվել է ինքնաձիգ, ընդ որում՝ դեպքի վայրում ներկա են եղել նաև ոստիկանության ներկայացուցիչներ, որոնք դարձյալ որևէ քայլ չեն ձեռնարկել այս հանցագործությունը կանխելու ուղղությամբ: Հարձակման հետևանքով հրազենային և այլ ծանր մարմնական վնասվածքներ են ստացել չորս հոգի, այդ թվում մեկ պատանի, որոնք այժմ գտնվում են հիվանդանոցում»:

Իր հերթին պարզաբանում էր ներկայացրել նաև ոստիկանությունը, թե նախնական տեղեկություններով՝ վիճաբանությունը ծագել է Ջրառատի դպրոցում, ավելի ուշ վեճի մասնակիցներին միացել են այլ գյուղացիներ: «Փորձ է արվել կիրառել ինքնաձիգ, ներկաները փորձել են կանխել դա, ինչից հետո հնչել են կրակոցներ»,- նշված է ոստիկանության պարզաբանման մեջ:

Ինչևէ, սա ապրիլյան խորհրդարանական ընտրություններին ընդառաջ առաջին աղմկոտ միջադեպն էր, որի մի կողմում իշխանություններն են, մյուս կողմում՝ ՕՐՕ դաշինքը: Իսկ իշխանություններին անհրաժե՞շտ էր նախընտրական շրջանում նման միջադեպ գրանցել: Չէ որ նրանք անբիծ ընտրություններ անցկացնելու վերաբերյալ հայտարարություններ են անում: Իշխանությունները թեև ռեյտինգային ընտրակարգ են ներդրել, բայց հասկանալով դրա առաջացրած լարվածությունը՝ բոլոր ընտրատարածքներում իրենց ռեյտինգային թեկնածուներին ստիպում են միջադեպեր չառաջացնել: Միակ միջադեպը գրանցվել էր Արարատի մարզում Հանրապետական կուսակցության թեկնածուներ Մուրադ Մուրադյանի և մարզպետ Արամայիս Գրիգորյանի եղբոր՝ Արայիկ Գրիգորյանի մասնակցությամբ: Բայց Սերժ Սարգսյանն անմիջապես բոլորին հավաքել էր ու խստիվ հրահանգել՝ այլևս նման արարքներ թույլ չտալ: Հատկապես, որ ՀՀԿ-ն ու իր ռեյտինգային տեկնածուներն ունեն հզոր ֆինանսական ու վարչական լծակներ, որոնց օգնությամբ կարող են անաղմուկ հաջողություն գրանցել ընտրություններում:

Ուրեմն ո՞ւմ էր անհրաժեշտ նման նախընտրական աղմուկ բարձրացնելը և քաղաքական դաշտի ու հանրության ուշադրությունն իր վրա գրավելը: Գուցե միջադեպի մյո՞ւս կողմին՝ հենց ՕՐՕ-ին: Չէ որ դա կարող է այդ դաշինքին հնարավորինս ճանաչելի դարձնել, հնարավորինս հնչեղ իրադարձությունների կիզակետում դնել: Հատկապես, որ ապրիլյան ընտրությունների վերաբերյալ վերջին սոցհարցումների համաձայն՝ դաշինքի վարկանիշը գոնե 2 տոկոսի չէր հասնում: Եվ Ջրառատում կատարված միջադեպը ոչ միայն հանրությանը հայտնի դառնալու համար շատ հարմար առիթ էր, այլև այն կարող են օգտագործել որպես իշխանությունների կողմից իրենց վրա ճնշում գործադրելու փորձ, ինչը և անում են: Հատկապես, որ ՕՐՕ դաշինքի առաջնորդ Սեյրան Օհանյանը հաճախ է հայտարարում, որ իրենք են միակ ընդդիմությունը, և իշխանություններն փորձում են վարկաբեկել ու ճնշել իրենց: Հավանաբար հենց այդ պատճառով էլ նրանք որոշեցին այդ միջադեպը թեժացնել ու այսօր արդեն շարունակական դարձնել:

Եվ իզուր չէ, որ այդ միջադեպի առնչությամբ շտապեց պարզաբանում տալ նաև ՀՀԿ փոխնախագահ, ՀՀԿ-ի նախընտրական քարոզչության պատասխանատու Արմեն Աշոտյանը, ով «Ազատություն» ռադիոկայանին այսպես էր ասել. «Որոշ լրատվամիջոցներ ցանկանում են այս ընտրություններին քարոզչական մի սյուժե հորինել, սարքել՝ հակադրելով ՕՐՕ-ն ՀՀԿ-ին: Նման հակադրությունների կարիք բացարձակապես չկա: Ես հասկանում եմ, որ քարոզչական տեսակետից դա գուցե ձեռնտու է նաև ՕՐՕ-ին, որովհետև, հակադրվելով քաղաքական ամենամեծ և հավակնություններ ունեցող իշխանական ուժին, շանս են տեսնում իրենց ռեյտինգի բարձրացման, բայց մենք այդ խաղը չենք խաղալու»:

Եվ այսպես՝ ՕՐՕ-ին ու նրա հովանովորներին ինչ-որ չափով հաջողվեց աղմուկ բարձրացնել և ուշադրություն գրավել: Ի դեպ, այս միջադեպի շրջանակներում հետաքրքիր է նաև հովանավորների հանգամանքը: Արդեն իսկ ընդունված կարծիք կա, որ այդ դաշինքի տետևում կանգնած է Ռոբերտ Քոչարյանը: Չէ որ դաշինքն իրականում ղեկավարում է նրա դաշնակից Սամվել Բաբայանը: Բացի այդ, Ռ. Քոչարյանի դաշնակիցն է մինչև այժմ համարվում նրա նախագահության շրջանի արտգործնախարար Վարդան Օսկանյանը: Եվ Ջրառատի միջադեպի հետևում կարծես թե հենց նրանց շունչն է զգացվում:

Այս ընտրությունները Ռ. Քոչարյանի, Ս. Բաբայանի ու նրանց դաշնակիցների համար իշխանության գալու թեև թույլ, բայց վերջին շանսերն են, ինչին փորձում են ամեն գնով հասնել: Եթե անգամ չկարողանան հասնել, ինչը ավելի հավանական է, գոնե օգտագործելով բոլոր հնարավոր լծակները՝ կարողանան հաղթահարել դաշինքի համար նվազագույն համարվող 7 տոկոսի շեմն ու անցնել Ազգային ժողով: Այնտեղ արդեն կարող են համագործակցել այլ ոչիշխանական ուժերի հետ ու իշխանությունների համար գլխացավանքներ առաջացնել:

Եվ եթե անգամ դա էլ չիրականանա, ՕՐՕ-ի հովանավորները կբավարարվեն այս ընտրություններն էլ հարամելու փորձով: Նրանք ամեն ինչ կանեն, որ այս ընտրություններն էլ իշխանությունների վրա թանկ նստեն: Որ այս ընտրությունների հետևանքների, ինչպես 2008թ. նախագահական ընտրությունների հետևանքներն ու ցնցումները իշխանությունները երկար տարիներ կրեն՝ իրենց բոլոր բացասական ազդեցություններով, ներքին ու արտաքին ճնշումներով: Ահա թե ինչու կամ իրականում ովքեր են թեժացնում Ջրառատի միջադեպը: