Րաֆֆի Հովհաննիսյանը «քաղաքացիական ժողով» է կազմակերպում

Դեկտեմբերի 5-ին «Ժառանգություն» կուսակցության առաջնորդ Րաֆֆի Հովհաննիսյանը բոլորին հրավիրում է Ազատության հրապարակ` մասնակցելու քաղաքացիական ժողովին: Այսօր` դեկտեմբերի 1-ին, լրագրողների հետ հանդիպմանը Րաֆֆի Հովհաննիսյանը հայտարարեց, որ իրենք հրավիրում են բոլոր խորհրդարանական և արտախորհրդարանական ուժերին, քաղաքացիական հասարակություններին և անհատներին:

«Մենք մեր բոլոր նախաձեռնությունները ներկայացրել ենք մեր գործընկերներին: Անձամբ ինքս մինչեւ հիմա չունեմ արձագանք, բայց վստահ եմ, որ դեկտեմբերի 5-ին կունենանք որակյալ քանակ»,- ասաց նա:

Հովհաննիսյանի խոսքով` ինքը հույս ուներ, որ եռյակը նոյեմբերին կհանդիպեր ժողովրդի հետ հրապարակում, սակայն այդպես չեղավ և հետևաբար, ինքը հրավիրեց հանրահավաք:

Նշենք, որ դեկտեմբերի 5-ից մեկ օր անց «Ժառանգությունը» հանրահավաքներ է կազմակերպելու նաև Գյումրիում եւ Վանաձորում: