ՌԻՄԱ ԴԵՄԻՐՃՅԱՆ. «Դա ընդունելի չէ, դրան կտրականապես դեմ եմ: Կազինոն ո՞րն է»

Ես միշտ այն կարծիքի եմ եղել, որ մարզահամերգային համալիրը պետք է լինի պետության տնօրինության տակ, մի նմուշ գոնե պետք է պահվի: Այս մասին Armtimes.com-ի հետ զրույցում ասել է Ռիմա Դեմիրճյանը՝ անդրադառնալով ամուսնու անունը կրող մարզահամերգային համալիրի շուրջ տեղի ունեցող վերջին իրադարձություններին։

Նրա խոսքով, Մարզահամերգային համալիրն ազգային արժեք է։ «Այսպես ձեռքից ձեռք փոխանցելով ո՞ւր պետք է հասնեն: Ամեն ինչը ցիրուցան եղավ, այդ ունիկալ օբյեկտներից որը քանդեցին, որը մնաց չօգտագործված»,-ասաց Կարեն Դեմիրճյանի այրին։

Նա անընդունելի է համարում Մարզահամերգային համալիրում նաև կազինո տեղակայելը, բայց և չի շտապում հավատ ընծայել այդ մասին տեղեկություններին: «Դա ընդունելի չէ, դրան կտրականապես դեմ եմ: Կազինոն ո՞րն է: Եթե այնտեղ կազինո լինի, էլ ոչ մի ուրիշ բաների մասին խոսելու կարիք չկա. ոչ սոցիալական ուղղվածության, ոչ ընտանեկան ինչ-որ միջոցառումների, ոչ միջազգային միջոցառումների, ոչ արվեստի: Կազինոն ամեն ինչը կխեղդի: և ընդհանրապես դա անվայել է: Բայց ես չգիտեմ` որքանով են ճիշտ այդ լուրերը»,- ասաց նա:

Հարցին, թե կազինոյի վերաբերյալ համոզվելուց հետո հնարավո՞ր է իր ընտանիքը դիմի կառավարությանը, որպեսզի Կարեն Դեմիրճյանի անունը հանվի կազինո ունեցող Համալիրի վրայից, տիկին Ռիման արձագանքեց. «Դա արդեն մենք կմտածենք: Նախ պետք է ճշտվի, որ կազինո է լինելու այնտեղ: Ես ուղղակի չեմ կարծում, համոզված չեմ, որ այնտեղ կազինո կանեն: Եթե կազինո է, սաունաներ են և այլ անթույլատրելի բաներ, էլ ինչու են ձեռքից ձեռք գցում: Նախորդ ընկերությունն էլ կաներ դա, կպահեր: Հիմա շուտ է այդ մասին խոսել: Դրան, ինձ թվում է, չի հասնի: Ոչ ոք չի իմանում` ո՞վ է գնորդը, այդ ինչ ընկերություն է` հապճեպ ստեղծված, ինչ նպատակներ է հետապնդում, ինչ են անելու այնտեղ»:

Նա նաև տարակուսեց, թե Համալիրում կազինո ստեղծելով` կնշանակի իշխանությունները դեմ են գնում իրենց իսկ ընդունած օրենքին, համաձայն որի քաղաքում նման օբյեկտներ չպետք է լինեն: «Իրենց ընդունած օրենքն են խախտում: Իրենք ընդունեցին, չէ՞, որ քաղաքում թույլատրելի չէ կազինո: Հիմա ամենահարմար տեղը գտան, ամենասուրբ տեղը»,- ասաց Ռիմա Դեմիրճյանը: