Ռոբերտ Քոչարյանը պատրաստվում է

Հայկական ժամանակը գրում է, որ առաջիկա ժամանակահատվածում հարցազզրույցով հանդես կգա Ռոբերտ Քոչարյանը, որից հետո կհայտարարվի Վարդան Օսկանյանի նոր կուսակցության ստեղծման մասին: Թերթը գրում է, որ այդ մասին խոսում են իշխանական կուլիսներում եւ քաղաքական շրջանակներում:
Վարդան Օսկանյանի կուսակցություն ստեղծելու մտադրության մասին գրվեց ԲՀԿ-ից նրա հեռանալուց անմիջապես հետո, փետրվարի հայտնի իրադարձություններից կարճ ժամանակ անց: Օրերս սակայն տեղեկություն էր հայտնվել մամուլում, թե մի ընդունելության ժամանակ ԱՄն դեսպանը հետաքրքրվել է Վարդան Օսկանյանից կուսակցական ծրագրերի մասին, ինչին ի պատասխան նախկին արտգործնախարարն ասել է, որ չունի այդպիսի մտադրություն:
Գրեթե զուգահեռ, ԲՀԿ ղեկավար Նաիրա Զոհրաբյանն էր անդրադարձել թեմային ու ասել, որ Վարդան Օսկանյանը կուսակցությունից հեռանալով հայտնել է, որ եթե ունենա նոր կուսակցություն բացելու մտադրություն եւ ձեռնամուխ լինի իրականացմանը, ապա դրա մասին առաջինը տեղեկացվողներից կլինի հենց Նաիրա Զոհրաբյանը: Զոհրաբյանը այդ պահին չուներ տեղեկություն, որ Օսկանյանը կուսակցություն է բացում:
Ըստ Հայկական ժամանակի, քաղաքական եւ իշխանական շրջանակներում խոսվում է այն մասին, որ Վարդան Օսկանյանի նոր կուսակցությանը կմիանան ներկայում ԲՀԿ-ում մնացած մի շարք գործիչներ, որոնք համարվում են Ռոբերտ Քոչարյանի թիմի անդամ:
Ըստ թերթի, Օսկանյանի կուսակցությունը հենց Ռոբերտ Քոչարյանն էլ կֆինանսավորի, իսկ կուսակցությունը հանդես կգա Սահմանադրության փոփոխության դեմ ու կհարի ոչ-ի շարժմանը:
Այն, որ Ռոբերտ Քոչարյանը դեմ կլինի Սահմանադրության փոփոխությանը, տրամաբանական է: Սերժ Սարգսյանի նախագահության երկրորդ ժամկետից հետո Ռոբերտ Քոչարյանը նախագահի իշխանական թեկնածու լինելու գլխավոր հավակնորդներից էր եւ սպասում էր իր հերթին: Եթե փոխվում է Սահմանադրությունը եւ նախագահի ինստիտուտը փաստացի դառնում է նշանակովի, ու դրան զուգահեռ ձեւավորվում են իշխանության հավասարազոր եւ նույնիսկ ավելի ազդեցիկ մի քանի կենտրոններ, ապա երկրորդ նախագահը կորցնում է որպես առաջին դեմք վերադառնալու հնարավորությունը:
Հետեւաբար, տրամաբանական է, որ նա կլինի Սահմանադրության փոփոխության եւ խորհրդարանական կառավարման մոդելի անցման դեմ:
Բայց, այստեղ թերեւս միայն նախագահի պաշտոնի վերադառնալու հեռանկարի խնդիրը չէ, որ կարող է մտահոգություն եւ Սահմանադրության փոփոխության հանդեպ դժգոհություն առաջացնել երկրորդ նախագահի մոտ: 

մանրամասները՝lragir.am-ում: