Ռուբեն Բալոյան. «Աքիլլես» ՀԿ-ն շահագրգիռ անձ է

Փաստինֆոն գրում է. Կոտայքի մարզի ընդհանուր իրավասության դատարանում Վարդան Պետրոսյանի վթարի գործով դատավարության այսօրվա նիստը մեկնարկեց տուժողների շահերի ներկայացուցիչ Ռուբեն Բալոյանի խոսքով, ով կարծիք հայտնեց դատական նախորդ նիստում Վարդան Պետրոսյանի փաստաբան Նիկոլայ Բաղդասարյանի ներկայացրած միջնորդության վերաբերյալ:

«Աքիլլես ՀԿ-ն կարող էր կարծիք հայտնել միայն այն դեպքում, երբ վարույթն իրականացնող մարմինը վերջինին ներգրաված լիներ՝ մասնագիտական գիտելիքներն օգտագործելով դատավարական գործողությանն աջակցելու համար»,- ասաց Ռուբեն Բալոյանը՝ հավելելով. «լինելով ՀԿ և շահագրգիռ անձ, կազմակերպությունը կետ առ կետ արձանագրել է պաշտպանական կողմի դիրքորոշումը»:

Հիշեցնենք՝ Վարդան Պետրոսյանի փաստաբան Նիկոլայ Բաղդասարյանը միջնորդել էր գործին կցել մի շարք նյութեր, այդ թվում` «Աքիլլես» ՀԿ-ի կողմից դեպքի վայրի սխեմայի ու գեոդեզիական կենտրոնի չափագրության համեմատականը:

Այս երկու փաստաթղթերը, ըստ փաստաբանի, չեն համապատասխանում իրար: Բացի այդ Նիկոլայ Բաղդասարյանը հայտարարել էր, որ դեպքի վայրի զննության արձանագրության մեջ քննիչը չի նշել՝ ինչպիսի տեխնիկական միջոցներ են օգտագործվել, չի նախազգուշացվել մասնակիցներին այդ տեխնիկական միջոցների օգտագործման մասին, արձանագրության տեքստային մասը չի համընկնում արձանագրությանը կցված սխեմային, իր հերթին սխեման չի համընկնում բնության մեջ գոյություն ունեցող դեպքի վայրին:

Պատասխանելով Ռուբեն Բալոյանի հնչեցրած կարծիքին՝ Նիկոլայ Բաղդասարյանն այսօր հավելեց, որ չափագրումը ոչ թե «Աքիլլես» ՀԿ-ն է կատարել, այլ՝ «Գոլդեն լեքս» հավաստագրված ընկերությունը, որին նման պատվերով դիմել է ինքը` որպես պաշտպան: