Ռուսաստանը հերթական անգամ փրկեց Ալիևին,փորձեց արդարանալ Բաքվի առաջ. Ս.Սաֆարյան

Ռուսաստանը հերթական անգամ փրկեց Ալիևին : Այս մասին ELQ-ի հետ զրույցում ասաց քաղաքական վերլուծաբան Ստյոպա Սաֆարյանը.

«Արտգործնախարարների ասուլիսն այնպես կազմակերպվեց, որպեսզի չխոսվի Ադրբեջանի կողմից միջազգային իրավունք, պարտավորություն խախտելու փաստը և հենց այն, որ դրանից չեն խոսում, արտգործնախարարները խոսում են այլ թեմաներից նշան է, որ Ռուսաստանը հերթական անգամ փրկեց Ալիևին»,- ասաց նա:

Ս.Սաֆարյանի խոսքով՝ իհարկե, հնչեցին նաև Ադրբեջանի դեմ հայտարարություններ, բայց խոշոր հաշվով Ռուսաստանը, ոչ միայն որպես ՀՀ ռազմավարական դաշնակից, ոչ միայն որպես ԵԱՀԿ Մինսկի խմբի համանախագահ այդպես էլ չխոսեց Ադրբեջանի կողմից միջազգային նորմերի, սկզբունքների և պարտավորությունների կոպտագույն խախտման մասին և որպես պատերազմի սանձազերծողի մասին: Այդ հարցը, նկատեց նա, շրջանցվեց. «Թերևս միակ կարևորը, որ հայտարարվեց, այն է, որ Ղարաբաղյան հակամարտության կարգավորումն ընթանալու է ԵԱՀԿ Մինսկի խմբի շրջանակներում : Չարվեցին նաև հայտարարություններ այն մասին, ինչի մասին վերջին օրերին շատ գրեց ռուսական մամուլը՝ տարածքների վերադարձի մասով և այլն» :

Կարևոր հայտարարությունն այսօր նաև այն էր, որ Կազանի փաստաթուղթը մերժող կողմը Ադրբեջանն է.

«Ըստ էության Լավրովն ուզում է ցույց տալ, թե Ռուսաստանն ամեն ինչ արել է, որպեսզի տարածքների մի մասը վերադարձվի Ադրբեջանին, Հայաստանը համաձայն է եղել,, բայց Ադրբեջանը չի ցանկացել գնալ այդ լուծմանը : Ընդամենը Ռուսաստանը փորձեց Երևանում արդարանալ Բաքվի առաջ և սա անթույլատրելի է»,- շեշտեց Ս.Սաֆարյանը :

Հարցին՝ ի՞նչ վտանգներ է դա իր մեջ պարունակում, մեր զրուցակիցը նշեց, որ միայն այն, որ հիմնական խնդրի մասին չխոսել, որ անհրաժեշտ էր լուծել՝ Ադրբեջանի պարտավորությունների չկատարման, միջազգային նորմերի խախտման մասին, այդ ամենը նոր ճանապարհ է բացում լարվածության համար :

«Լավրովի այցը ևս մեկ անգամ ցույց տվեց, որ Ռուսաստանը այնքան էլ ուրախ չէ վերջին շրջանում Ադրբեջանի կատարած քայլերից, հատկապես Իսլամական երկրների համագործակցության կոնֆերանսին մասնակցությունից, որն, ըստ էության, հակառուսական ուղղվածություն ուներ՝ Թուրքիա-Սաուդյան Արաբիա դաշինք, դրա շրջանակում Ալիևի հանդիպում ՌԴ հակառակորդների հետ, հետևաբար ՌԴ-ն, մի կողմից բաց թողնելով պատուհանը, մյուս կողմից հասկացնում է, որ եթե Ադրբեջանը հույսը դրել է իսլամական պետությունների վրա, ապա ինքը Ղարաբաղյան խնդրի կարգավորման ուղղությամբ այլևս ջանք չի գործադրի և խնդիրը կընթանա ԵԱՀԿ Մինսկի խմբի շրջանակներում»,- հավելեց Ս.Սաֆարյանը :

elq.am