Սամվել Բաբայանն իրեն առաջադրված մեղադրանքի հետ որևէ առնչություն չունի. փաստաբան

ԼՂՀ Պաշտպանության բանակի նախկին հրամանատար Սամվել Բաբայանն իրեն առաջադրված մեղադրանքի հետ որևէ առնչություն չունի: Նրան առաջադրվել են կոնկրետ մեղադրանքներ, արարքներ, որն իբր կատարել է Սամվել Բաբայանը, սակայն բավարար հիմքեր չկան նման մեղադրանք առաջադրվելու համար: Այս մասին այսօր մի քանի լրագրողների հետ հանդիպման ժամանակ ասաց Սամվել Բաբայանի պաշտպան Ավետիս Քալաշյանը։

«Պատվիրվել է, որ պետք է զենքը բերվի Հայաստան, խոստացել է, որ պետք է վճարում կատարվի զենքի համար, այդ կապակցությամբ ինչ-որ հանձնարարություններ է տվել որոշ մարդկանց, Սամվել Բաբայանը ոչ մի նման գործողություն չի կատարել: Եթե խոսում ենք առնչության մասին, ապա դա պետք է վերաբերի բուն մեղադրանքին, եթե անձին առաջադրում են որևէ մեղադրանք, ապա դա պետք է հիմնավորված լինի գործով ձեռք բերված ապացույցներով: Դատախազության այն հայտարարությունը, թե Սամվել Բաբայանն ընդունել է իր առնչությունը կատարված հանցագործությանը, դա միանշանակ իրականությանը չի համապատասխանում, ես չէի ասի, որ կեղծ է հայտարարությունը, միգուցե այդ առնչությունը մեկնաբանվել է յուրովի»,– ասաց նա:

Պաշտպանը նշեց, որ Սամվել Բաբայանն իրեն առաջադրված մեղադրանքից զատ որոշակի առնչություն ունի.«Առայժմ ես զերծ կմնամ այդ առնչությունը բացահայտելուց, ժամանակը կգա և հանրությունն ամենայն մանրամասնությամբ այդ ամենին կտեղեկացվի: Այժմ քննության շահերից ելնելով մանրամասներ չեմ հայտնի, բայց միանշանակ ասում եմ, որ այդ առնչությունը այն առնչությունը չէ, որ անձին կարող են կալանավորել»:

Հարցին, թե ովքեր են մյուս կալանավորվածները, և արդյոք առերեսում եղել է, պաշտպանն ասաց, որ առերեսում չի եղել, որովհետև Սամվել Բաբայանի դեմ նրանցից որևէ մեկը ցուցմունք չի տվել.«Կալանավորվածներից մեկին Սամվել Բաբայանը ճանաչում է, իր մարտական ընկերն է, մյուսներին չի ճանաչում»: