Սենսացիոն «փոխզիջում» էլէներգիայի գնի հարցով

Հովիկ Աբրահամյանը կառավարության հունիսի 25-ի նիստում հաստատեց, որ էլէներգիայի թանկացման որոշումը չի վերանայվելու, փոխարենը կառավարությունը որոշել է փոխհատուցել նպաստի չափը բարձրացնելու միջոցով: 105 հազար ընտանիք կստանա ամսական 2000 դրամ ավելի, ինչը բյուջեի վրա կնստի մոտ 2,5 միլիարդ դրամ:
Այսինքն, կառավարությունը բյուջեից, այսինքն հարկատուների գրպանից փոխհատուցում է ՀԷՑ-ի ծախսերը:
Արդյոք սա այն փոխհատուցումն է, որի մասին ակնարկել է Ռուսաստանի ԱԳՆ-ն իր հայտարարության մեջ, նշելով, որ հույս ունեն, որ Հայաստանի իշխանությունը կունենա ողջախոհություն՝ կայացնելու այնպիսի որոշում, որը կբավարարի բոլոր կողմերին: Ելնելով սակայն Ռուսաստանի ու Հայաստանի իշխանությունների բնույթից, կարելի է պնդել, որ ՌԴ ԱԳՆ-ն զգուշացրել է Հայաստանի կառավարությանը, որ որոշումը չպետք է հարվածի ՀԷՑ-ի շահույթին: Այս պնդումը հաստատվում է կառավարության նիստում հենց Հովիկ Աբրահամյանի ելույթով, ով մտահոգություն էր հայտնել, որ ՀԷՑ-ի շահույթը կարող է նվազել:

Խնդիրը հենց շահույթն է, այլ բան նրանց չի հետաքրքրում: Եվ այստեղ բացվում է բավական հետաքրքիր շերտ: Բանն այն է, որ ՀԷՑ-ի շահույթը «կիսվում» է երկու մասի՝ մի մասը ռուսական ընկերությանը, մյուս՝ ստվերային մասը՝ Հայաստանի իշխանական-քրեա-օլիգարխիկ համակարգին:
Սակագինը բարձրացնելու վերաբերյալ ՀԷՑ-ի հայտի ուսումնասիրությունը պարզեց մի հետաքրքիր պատկեր. այն կոռուպցիոն մի հսկա կերակրատաշտ էր, որտեղ հայկական քրեա-օլիգարխիկ համակարգն ուներ հստակ քվոտաներ: Այդ քվոտաները վերաբերվում են ինչպես կադրային հարցերին, այնպես էլ ՀԷՑ-ի «շահույթից» մասնաբաժնին: Օրինակ, նույն Հովիկ Աբրահամյանի հարազատ Արարատի մարզում այս ոլորտում պատահական մարդիկ չկան, ղեկավար պաշտոններում նրա հարազատներն ու մերձավորներն են:

Բացի այդ, հայտի ուսումնասիրությունից պարզվել է, որ ՀԷՑ-ը շռայլ գնումներ է կատարում ինչ որ ընկերություններից, որոնց ստվերային տերերը կամ հովանավորները Հայաստանի բարձրաստիճան պաշտոնյաներն ու նրանց մերձավորներն են: 

մանրամասները`lragir.am-ում: