Սերժ Սարգսյանը պատրաստել է ամենաբարձր պաշտոնը

ՀՀԿ Գործադիր մարմնի վերջին նիստից առաջ լրագրողները ԳՄ անդամ Գագիկ Բեգլարյանին հարցրել են, թե առաջիկայում հնարավո՞ր է իրեն պաշտոն առաջարկեն:

«Դուք երևի չգիտեք, որ ամենաբարձր պաշտոններից մեկը ՀՀԿ Գործադիր մարմնի անդամն է: Բոլոր պաշտոններն այստեղ են տալիս»: Հարցին, թե կառավարությունում պաշտոն չի՞ ուզում, նա պատասխանել է. «Ավելի ցածր գնա՞մ, սա լավ ա»:

ՀՀԿ ԳՄ այդ նիստում որոշում է կայացվել նոր Ազգային ժողովի ղեկավար կազմի թեկնածուների վերաբերյալ, ովքեր արդեն նշանակվել են:

Գագիկ Բեգլարյանը փաստացի բացահայտել է Հայաստանում կառավարման նոր կարգը, որը «թղթով» կոչվում է խորհրդարանական կարգ, իսկ դե ֆակտո՝ մեկ կուսակցության իշխանություն: Այդ կուսակցության ԳՄ-ն է նշանակում բոլոր պաշտոնյաներին, կայացնում բոլոր որոշումները, որոնք պարտադիր են լինելու պետական բոլոր մարմինների համար: Այս պայմաններում ցանկացած պաշտոն իհարկե ավելի ցածր է, քան ԳՄ անդամի պաշտոնը:

Իսկ կուսակցության ղեկավարն, իր հերթին, դառնում է պետության դե ֆակտո բարձրագույն ղեկավարը, եթե պահպանում է մեծամասնությունը կուսակցությունում: Ոչ թե խորհրդարանում,- խորհրդարան գոյություն չունի որպես այդպիսին, - այլ հենց կուսակցությունում: Ընդ որում, ներառյալ նաեւ Ծառուկյան դաշինքն ու ՀՅԴ-ն:

Վերջին տասնամյակում փաստացի հենց այդպես էլ եղել է, սակայն այս իրողությունը բյուրեղացվել ու լեգիտիմացվել է նոր Սահմանադրությամբ ու 2015 թ-ից սկսված իշխանության վերադասավորման գործընթացով:

ԳՄ նիստից հետո տեսակետներ են հնչել, որ Սերժ Սարգսյանը, նշանակելով Արա Բաբլոյանին, փաստացի ինքն իրեն է նշանակել ԱԺ նախագահ: Այս պնդումն արտացոլում է իրականությունը. Սերժ Սարգսյանն արդեն իսկ ինքն իրեն նշանակել է ուժային բոլոր կառույցների ղեկավար, ԱԺ նախագահ: Մնում է վարչապետի պաշտոնը, որն արդեն իսկ տեխնիկական խնդիր է, թեեւ ըստ Սահմանադրության վարչապետը 2018-ից հետո դառնում է պետության ղեկավարը: Եթե ՀՀԿ-ում մեծամասնության խնդիրը լուծվում է, ապա վարչապետի պաշտոնում Սերժ Սարգսյանը նույնպես նշանակելու է «ինքն իրեն»:

Այսպիսով, Սերժ Սարգսյանի որեւէ պաշտոն զբաղեցնելու, կամ զբաղեցնելիք պաշտոնի խնդիրը դառնում է երկրորդական: Ազգային ժողովի մեկնարկին նրա ելույթը առիթ տվեց խոսելու, որ դա հեռացող նախագահի խոսք չէր: Ավելին կարելի է ասել՝ դա ոչ միայն չհեռացող նախագահի, այլ Գագիկ Բեգլարյանի ասած՝ «ավելի բարձր պաշտոն» ունեցողի ելույթ էր:

Lragir.am