Սիրունյանն ասաց՝ իր ուժերով կունենա, հանգիստ գնացեք տուն. պատմում է մահացած երեխայի հայրը

Երեւանի «Շենգավիթ» բժշկական կենտրոնում նոյեմբերի 19-ին նախածննդյան փուլում մահացած երեխայի հորը՝ Ալիկ Քոչարյանին, հերթապահ բժիշկը դեպքից ժամեր առաջ հավաստիացրել է, որ ծննդաբերությունը նորմալ է անցնելու, եւ ուղարկել է տուն:

«12 օր կինս պառկել է այդ հիվանդանոցում, 12 օր մենք գնացել, եկել ենք, մեզ բժիշկն ամեն անգամ հավաստիացնում էր, որ ամեն ինչ նորմալ է լինելու: Դեպքի օրն էլ բժշկուհի Սիրունյանն ինձ ասաց՝ հանգիստ գնացեք, ամեն ինչ նորմալ է, Լարիսան իր ուժերով առողջ երեխա կունենա: Ես ու մայրս հիվանդանոցից դուրս եկանք, դեռ Արմավիր չէինք հասել, զանգեցին ու ասացին, որ երեխայի սրտի բաբախը կանգ է առել»,- NEWS.am-ի թղթակցին պատմեց Ալիկ Քոչարյանը:

Քոչարյանի կինը՝ 25-ամյա Լարիսա Շախպազյանը «Շենգավիթ» բժշկական կենտրոն է ընդունվել նոյեմբերի 9-ին. 34 շաբաթական հղիին այս հիվանդանոց էին ուղեգրել «Արմավիր» բժշկական կենտրոնից:

«Պտղաջրերի վաղաժամ արտահոսք ուներ կինս, մեր մոտի հիվանդանոցից ուղեգիր տվեցին, բերեցինք Երեւան, այս օրերի ընթացքում անընդհատ սիստեմա են միացրել: Վերջին օրն էլ սիստեման անջատեցին, թե հիմա արդեն Լարիսան կարող է երեխան ունենալ»,- պատմեց Ալիկ Քոչարյանը:

Մահացած երեխայի հոր խոսքով՝ դեպքից հետ կինն իրեն պատմել է, որ այդ օրն իրեն դեղահաբ են տվել, որից հետո ինքն անմիջապես քնել է, իսկ երբ արթնացել է, պարզվել է՝ երեխայի սրտի բաբախը կանգ է առել. «Կինս պատմեց, որ իրեն դեղ են տվել երկրորդ անգամ, ինքը քնել է, իսկ բժիշկներն էլ գնացել են՝ ծնունդ ընդունելու: Գոնե ծնարան տանեին կնոջս, հետեւեին, ուշադիր լինեին, բայց ամբողջ ընթացքում ոչ ոք մոտը չի եղել»:

մանրամասն՝news.am-ում