Սոս Ջանիբեկյանի խորհուրդը Հովհաննես Ազոյանին արդյունավետ է եղել

«Խորհուրդ են տալիս հայտնիները» նախաձեռնության մասին ESem.am-ը պատմել է. Ընթերցասերներն այսօր հանդիպել էին դերասան Հովհաննես Ազոյանին՝ քննարկելու Ջորջ Օուրելի «Անասնաֆերմա» վիպակը:

Որպես նախաբան՝ Հովհաննեսը ներկաներին պատմեց, որ վիպակն ընտրել է դերասան Սոս Ջանիբեկյանի հորդորով: «Նա ասաց, որ հաշվի առնելով իմ քաղաքացիական հայացքները, ես պետք է կարդամ այդ վիպակը»,- ասաց Հովհաննեսն ու հավելեց, որ Սոսը ճիշտ էր:

 «Անասնաֆերմայի» հերոսները կենդանիներն են. մարդկանց դեմ նրանց ապստամբությունից և մարդկանցից անկախանալուց հետո տառաճանաչ խոզերը գալիս են իշխանության և… ազատության պատրանքի տակ սկսվում է ավելի վատ և դժվար իրավիճակ:

Վիպակի ենթատեքստը քաղաքական է, ընդ որում, դեռևս 1945 թվականին հրապարակված ստեղծագործությունն արդիական է հայաստանյան իրականությունում: 1 ժամ տևած քննարկման ընթացքում Հովհաննեսն ու ներկաները զուգահեռներ տարան սյուժեի և մեր իրականության միջև, բանավիճեցին, ներկայացրին իրենց տեսակետները:

Հովհաննեսի խոսքով՝ գրքի նախաբանում չէր կարդացել, որ «Անասնաֆերմա»-ն համարվում է 1917թ. հեղափոխության ծաղրերգությունը: «Ես զուգահեռներ էի տանում անկախությունից հետո մեր իրականության հետ», - ասաց դերասանը և խոստովանեց, որ ընթերցելիս հերոսներին էլ նույնացրել է մեր իրականության «հերոսների» հետ:

Ըստ դերասանի՝ հերոսները պետք է պայքարի դուրս գային այն ժամանակ, երբ առաջին անգամ խախտվեց նրանց սահմանած կանոնակարգը: ESem.am-ի դիտարկմանը, որ նրանք այնպես էին հավատում իշխանության, որ կասկածում էին իրենց հիշողությանը, Հովհաննեսն արձագանքեց, որ կասկածել, երկմտել պետք չէ: ESem.am-ի հետ զրույցում նա նշեց, որ հերոսներին պայքարելու, ապստամբելու համար խանգարում էր անգրագիտությունը. «Եթե ինչ-որ մեկն ավելի գրագետ է, փորձում ես ընդունել իր ասածները, քանի որ ինքդ տառաճանաչ չես»:

Ներկաները քննարկեցին նաև իշխանության գալուց հետո փոխվելու հավանականությունը: Ըստ դերասանի՝ այդ հավանականությունը շատ մեծ է: «Ես չգիտեմ՝ ինչ կլիներ, եթե իշխանության հասներ Ձնագնդին (իշխանության համար պայքարող մյուս հերոսը, որը վտարվեց ուժի կիրառմամբ, հեղ.), գուցե նա՞ էլ այդպիսին դառնար»,- ասաց նա, թեև զերծ մնաց համաձայնել հնչած կարծիքին, թե քաղաքականությունը պոռնկություն է:

Քննարկումը, որը երբեմն ուղեկցվում էր հակադիր կարծիքներով ավարտվեց ընդհանուր եզրակացությամբ այս ստեղծագործությունն իսկապես արժեքավոր է, քանի որ չնայած գրվել է 20-րդ դարասկզբին՝ ներկայացնում է համընդհանուր խնդիրներ և արդիական է նույնիսկ 21-րդ դարում:

Դերասանը նվերներ ստացավ նախաձեռնության հովանավորների կողմից, այդ թվում՝ հայկական արտադրության պլանշետ, իսկ վերջում ընտրեց քննարկման ամենաակտիվ մասնակցին: Հովհաննեսի ընտրությունը կանգ առավ ինձ վրա, ինչի համար շատ ուրախ եմ:) Որպես ակտիվ մասնակից նվեր ստացա Ալեքսանդր Դյումա որդու «Կամելիազարդ տիկինը» գիրքը: Չնայած երկու անգամ ընթերցել եմ այս վեպի ռուսերեն տարբերակը՝ առաջիկայում հայերենն էլ կկարդամ:)