Սոսի կարոտը՝ այլեւս սառը գերեզմանաքարից եք առնելու

Մամ ջան, սաղ լավ ա լինելու, մինչեւ ազերիներին ծնկի չբերենք` դիրքից չենք իջնի, դուք հանգիստ քնեք. առավոտ կզանգեմ,-սրանք են եղել Սոսի վերջին խոսքերը

Հուլիսի 14-ին հայ-ադրբեջանական պետական սահմանագոտու հյուսիսարևելյան հատվածում հակառակորդի արձակած կրակից` մահացու վիրավորում էին ստացել Սմբատ Գևորգի Գաբրելյանը , կրտսեր սերժանտ Գրիշա Վահանի Մաթևոսյանը, մայոր Գարուշ Վեմիրի Համբարձումյանը, և կապիտան Սոս Փայլակի Էլբակյանը: Հայրենիքի ազատության և խաղաղության համար իրենց կյանքը զոհած մեր հայրենակիցների առջև պարտք ունենք յուրաքանչյուրս:
Ովքեր էին նրանք, կյանքի ի՞նչ ճանապարհ էին հասցրել անցնել մեր քաջարի տղաները, NEWSMEDIA.am-ը կփորձի անդրադառնալ նրանցից յուրաքանչյուրին՝ առանձին-առանձին:
Դեպքի նախորդող օրն էր զանգել մեր ապագա գեներալը, մեր հպարտությունը, մեր Սոսը: Ծնողների հետ էր խոսել, հանգստացրել էր անհանգստացած ծնողներին ասելով. «Մամ ջան, սաղ լավ լինելու, մինչեւ ազերիներին ծնկի չբերենք՝ դիրքից չենք իջնի, դուք հանգիստ քնեք, առավոտ կզանգեմ»,-սրանք են եղել մեր Սոսի վերջին խոսքերը, բալես: Առավոտ արդեն կապից դուրս է գտնվել, հետո լսեցինք արդեն զոհվելու գույժը, խորը հոգոց հանելով Newsmedia.am-ի հետ զրույցում, ասաց 28-ամյա Սոսը Էլբակյանի հորեղբայրը՝ Համլետ Տիգրանյանը:

Սոսի կարոտն այլեւս սառը գերեզմանաքարից եք առնելու

Խոսելով Սոսի մարդկային եւ կամային հատկանիշների մասին.

-Հայրենասեր, չափից դուրս լուրջ տղա էր Սոսը: Մեծից փոքր հարգանք ունեին Սոսի հանդեպ, որը փոխադարձ էր: Դեռ դպրոցական տարիներից որոշել էր. «
Զինվորական եմ դառնալու»: Արյան կանչով այդպես էլ արեց. դպրոցն ավարտելուց հետո ընդունվեց Վազգեն Սարգսյանի անվան դպրոց, սիրահարված էր ռազմական գործի վրա: Գյուղի պարծանքն էր, բոլորս մտածում էինք, որ մեր գյուղի գներալն է դառնալու Սոսը: Համեստ, դաստիարակված մի ուրիշ տղա էր Սոսը: Սա որպես հարազատ չեմ ասում. իմ խոսքերը կփաստեն գյուղից բոլորը: 

Ընտանիքի փոքրն էր Սոսը. նպատակ ուներ, որ այս տարի պետք է ամուսնանա: Ինքը շատ լուրջ տղա էր, անձնականը դա անձնական էր , ոչ մեկի հետ այդ մասին չեն խոսում: Բայց ընկերներն ասում են, որ Սոսը ընտրած աղջիկ է ունեցել. լուրջ նպատակներ է ունեցել, բայց էդ նպատակները հոդս ցնդեցին: Հանուն հայրենիքի Սոսը զոհեց կյանքը, ծնողների կարոտը…Աննկարագրելի, անբուժելի ցավ է, ոչ ոք չի համարձակվում սփոփանքի խոսքեր ասել ծնողներին,. ինչ ասենք, ոնց ասենք, որ Սոսի կարոտն այլեւս սառը գերեզմանաքարից եք առնելու: Դաժան՝ շատ դաժան ցավ ա բալես(-արտասվում է.Հեղ.)….

Պատրաստեց՝ ՆՈՆԱ ԱԴԱՄՅԱՆԸ