Թե ինչու են հայերը նախընտրում հանգստանալ Վրաստանում. բացատրում են Ջերմուկի և Սևանի քաղաքապետները

Հայաստանյան հանգստի քաղաքներ հանդիսացող Սևանի և Ջերմուկի քաղաքապետները Tert.am-ի հետ զրույցում բացատրեցին, թե ինչն է ՀՀ քաղաքացիներին ստիպում հանգստի մեկնել ոչ թե Սևան կամ Ջերմուկ, այլ հարևան Վրաստան:

Նշենք, որ ըստ հրապարակված ցուցանիշների՝ միայն 2015-ի հուլիս ամսին Հայաստանից Վրաստան հանգստի է մեկնել 181 000 մարդ (ինչը 11.9%-ով ավելի է նախորդ տարվա նույն ժամանակահատվածի համեմատ):

Եթե Սևանի քաղաքապետ Ռուդիկ Ղուկասյանը որոշակի չափով համակարծիք էր, որ գնային քաղաքականությունը դեր ունի, ապա Ջերմուկի քաղաքապետը հավատացրեց, թե գնային քաղաքականությունը այստեղ ևս ճկուն է, ուղղակի մարդիկ նախընտրում են հանգստանալ ծովում: 

Սևանի քաղաքապետի խոսքով՝ նախընտրության առաջին պատճառը կլիմայական պայմաններ են: «Այս շրջաններում արևոտ օրերը շատ ավելի են, քան Սևանում, իսկ այն լողափերը, որոնց տերերը վարձակալել են, աշխատում են ընդամենը ամիսուկես, և պետք է այնքան աշխատեն, որ կարողանան մյուս ամիսների ծախսը փակել, դրա համար էլ գները բարձր են»,- ասաց նա:

Որպես երկրորդ պատճառ նա մատնանշեց ենթակառուցվածքները: «Այնտեղ կառուցապատումը լավն է, ենթակառուցվածքները լավն են, դրա համար էլ գնում են»,- ասաց նա: 

Հարցին, թե ինչն է խանգարում մեզ մոտ էլ նույն ենթակառուցվածքները զարգացնել, պատասխանեց՝ ոչ մի բան: «Դրա համար միայն հարկավոր է քաղաքական կամք, որպեսզի կոնկրետ ծրագիր իրագործեն կառավարության կողմից: Իրենց մոտ էլ, եթե հիշում եք, մի քանի տարի առաջ էլ մարդ չէր գնում, նույն ծովը կար, նույն տեղը կար, բայց որովհետև չկային համապատասխան ենթակառուցվածքներ, չէին գնում: Ուղղակի հարկավոր է մշակել նոր ծրագիր, կառավարությունը հաստատի, որի վրա էլ մենք աշխատենք և ամեն ինչի կհասնենք»,- ասաց նա:

Ռուդիկ Ղուկասյանը նշեց, որ պետք է թույլ տրվի կառուցապատում իրականացնել՝ այն էլ համատարած: «Համատարած կառուցապատման դեպքում մեկը սենյակի վարձակալություն է ունենում,  մյուսը հյուրանոց, էն մեկը ճաշարանը, որոնք էլ մրցակցության մեջ են մտնում ու գնային քաղաքականությունը մշակվում է ճիշտ ձևով, իսկ հիմա մեկը ստիպված ամեն ինչ է անում և դնում այն գինը, ինչ ուզում է»,- ասաց նա:

Սևանի քաղաքապետի առաջարկն է՝ թույլ տալ, որ լողափերը ոչ թե վարձակալեն, այլ սեփականաշնորհեն, ինչը թույլ կտա ներդրումներ անել:  Ըստ նրա՝ լողափում մարդկանց արած ներդրումներն իրենց սեփականությունը չի, երբ կուզեն նրանցից կարող են վերցնել դրանք։

«Բայց նորմալ պետություններում, նույն Ֆրանսիայում, մարդն ունի սեփականության իրավունք, որը թույլ է տալիս իր սեփականությունը հիպոթեկի առարկա դարձնել, վարկային ռեսուրսներ ներգրավել անընդհատ զարգացնել: Հիմա մեզ մոտ եթե կառավարությունը կառուցապատման որոշման գնա, որոշակի հատվածներ, այդ  թվում նաև Սևան վարչական տարածում, մարդիկ կկարողանան սեփականաշնորհել»,- ասաց նա։

««Հարսնաքարում» եղե՞լ եք, այդ ահռելի կառույցի տերն այդքան փող է ներդրել, բայց արդյունքում դա նրա սեփականությունը չէ, հիմա մենք ասում ենք հիմնական կառույցների համար տակի հողը սեփականության իրավունքով պետք է լինի, որ առևտրական դաշտ ստեղծենք»,- ասաց նա: 

Հարցին, թե արդյոք իրադրությունն է՛լ ավելի վատ չի լինի, եթե սեփականության իրավունքով տրամադրեն այդ տարածքներ, քանի որ սեփականատերերն արդեն վարձակալած հողերն են պարսպապատում՝ լողափերով հանդերձ, քաղաքապետը նշեց. «Ես ասում եմ էդ շենքերը հյուրանոցները, որ լինեն, դրանց տակի հողը պետք է տան, ոչ թե լողափերը, որպեսզի կարողանան վարկային ռեսուսր դարձնել, գրավի առարկա դառնա»:
Ռուդիկ Ղուկասյանը նաև նշեց, որ այսօր էլ հանգստացողների թիվը քիչ չէ. «Շաբաթ-կիրակի օրերը 50-55 հազար մարդ են ընդունում ճանապարհում»:

Ջերմուկի քաղաքապետ Վարդան Հովհաննիսյանը նշեց, թե չի կարծում, որ հայերը
նախընտրում են Վրաստանը: «Ուղղակի ուզում են ծով գնալ, «զագառ» անել, իսկ Ջերմուկում ծով չկա, առողջարանային քաղաք է և այստեղ գալիս են հանգստանալու համար, հիմա այս պահին մեզ մոտ հանգստացողները այնքան շատ են, որ ազատ սենյակ չունենք»,- ասաց նա:

Հարցին, թե համաձայն չէ, որ ներքին տուրիզմը թանկ է. «Դուք ջերմուկյան գներից տեղյա՞կ եք, որ ասում եք թանկ է: Ջերմուկում տարբեր գնային քաղաքականություն է տարվում, պետք է գալ և ճշտել. կան թանկանոց առողջարաններ, կան ուղղակի էժան հյուրանոցներ, կան ցածր որակի, կան բարձր գրպանի էլ, ընտրում ես: Հիմա դու չես կարող ցածր գին վճարել ու 5 աստղանի հյուրանոցում մնալ: Կա 5000 դրամանոց առողջարան մի գիշերվա համար, կա նաև 25-30 000 դրամանոց»:

 Դիտարկմանը, թե ընդունում է, որ պարտադիր սոցփաթեթների հաշվին է Ջերմուկի հյուրանոցները լիքը, քաղաքապետը նշեց, թե համակարծիք չէ: «Ի՞նչն է Վրաստանում էժան, դե երևի Քոբուլեթիի հանրակացարանում մնում են, օրը, երևի, 10 դոլար վճարում են ասում են՝ գիտեք ինչ լավ տեղ էինք մնում: Գնացեք Վրաստանի 5 աստղանի հյուրանոցների գները նայեք, և եկեք Ջերմուկ, համեմատենք, տեսեք, որն է թանկ»,- ասաց նա և կրկնեց, թե Ջերմուկում էլ ընտրության հնարավորությունը մեծ է, պարզապես Վրաստանի ծովն է մոտիկ, մեքենայով գնում են, եթե Բուլղարիան ավելի մոտիկ լիներ՝ կգնային Բուլղարիա։