Տնտեսական այս քաղաքականությամբ այլևս հնարավոր չէ երկիրը պահել առանց վարկերի

Ընդամենը մի քանի շաբաթ առաջ ՀՀ Ընտրական օրենսգրքը 131 մանդատ ունեցող խորհրդարանում 102 կողմ ձայնով ընդունվեց: Այժմ պարզվում է, որ իշխանությունը պատրաստ է նոր փոփոխությունների և կոնսենսուսն ընդլայնելու: Քաղտեխնոլոգ Արմեն Բադալյանի դիտարկմամբ` հարցն ամենևին էլ բուն ընտրական օրենսգիրքը չէ: Եթե այդպես լիներ, ապա այն կընդունվեր իրոք լայն կոնսենսուսի միջոցով:

Fnews.am-ի հետ զրույցում նա նկատեց, որ եթե խորհրդարանը ստանում է 102 կողմ ձայն, դա դեռ չի նշանակում կոնսեսուս. կոնսեսուսն ու ձայների մեծամասնությունը տարբեր բաներ են: «Կոսենսուսը նշանակում է, որ և՛ ընդդիմության, և՛ իշխանության, և՛ ՀԿ-ների ներկայացուցիչների միջև պետք է տեղի ունենար համաձայնություն, իսկ խորհրդարանի կողմից ընդունված ընտրական օրենսգիքրը համաձայնություն չէ. իշխող քաղաքական ուժը իր արբանյակ` փաստացի և ոչ փաստացի քաղաքական ուժերի հետ միասին կողմ քվեարկեցին` ունենալով թվային մեծամասնություն»,- նկատում է քաղտեխնոլոգը:

Նա հասկանում է, որ ԸՕ-ում կան թերություններ, որոնք ուղղել հնարավոր է, բայց իշխանությունը վերբացում է հարցը ոչ թե նրա համար, որ հանկարծ իմացավ, որ այդտեղ թերություններ կան, այլ նրա համար որ այստեղ կան քաղաքական պատճառներ...
Քաղտեխնոլոգի խոսքով` Միացյալ նահանգներն ու Եվրամիությունը, խստորեն պահանջում են որպեսզի հաջորդ տարվա ընտրությունները տեղի ունենան արդար և թափանցիկ: Արևմուտքում հասկանում են, որ ԸՕ-ի ընդունումը կոնսենսուս չէ և ՀՀ իշխանությունները չեն կարող խաբել նրանց: «Իհարկե Արևմուտքն իր շահերն ունի, էնպես չի որ Արևմուտքը հանկարծ դառել է բարեգործ և ցանկանում է, որ Հայաստանում ազնիվ ու արդար ընտրություններ լինեն: Բայց առաջինը հենց արևմուտքի վերանայելու պահանջն էր: Ու քանի որ ՀՀ իշխանությունների վարած տնտեսական քաղաքականությամբ այլևս հնարավոր չէ երկիրը պահել առանց վարկերի` ուստի պետք է ենթարկվեն արևմուտքի ճնշումներին: Իսկ որպեսզի դա չլինի բացահայտ ճնշում, այստեղ պատճառ են բռնում, թե տեքստում որոշակի թերություններ կան և լինելով քաղաքական լայնախոհեմ ուժ` ցանկանում են լայն կոնսեսուս անել»,-նկատում է Արմեն Բադալյանը: Հարցի վերաբացման որպես հաջորդ պատճառ` նա տեսնում է Ղարաբաղի հիմնահարցը, որն ազդում է ներքաղաքական գործընթացների վրա:

Թեև Արմեն Բադալյանը նկատում է, որ կան էլի պատճառներ, սակայն առաջնային պատճառներն ըստ նրա այս երկուսն են: Նա բացառում է հասարակության պահանջը, քանի որ ԸՕ-ն ընդունելուց հետո, ժողովրդը ոտքի չկանգնեց. ոչ ցույցեր, ոչ զանգվածային հավաքներ կամ ելույթներ: Դիտարկմանը, թե նոր հարկային օրենսգրքն ԱԺ առաջին ընթերցմամբ ընդունվեց, ինչը, մտահոգության տեղիք է տվել և արդեն կոչեր են հնչում, որ մարդիկ փողոց դուրս կգան, քաղտեխնոլոգը նկատեց, որ վերջին 2 տարվա ընթացքում շատ առիթներ ու կոչեր են եղել, թե սա արդեն վերջն է, և մարդիկ փողոց դուրս կգան: «Այո, մարդիկ դուրս կգան փողոց, բայց այդ փողոցով կգնան Զվարթնոց օդանավակայան, որպեսզի ընդմիշտ հեռանան երկրից:

Այսինքն դուրս կգան` արտագաղթելու համար: Մեկընդմիշտ հիշեք, փողոց դուրս գալը Հայաստանում արդեն վերացել է, որևէ հարց այլևս ժողովրդին պայքարելու համար դուրս չի բերի: Այո կարող է 5000 հոգի դուրս գալ, բայց ավելին դուրս չի գա, կամ նախընտտրականի ժամանակ մի քիչ ավելի, բայց մարտի մեկի զանգավածն ահլևս չի լինի»: Ըստ Արմեն Բադալյանի` արդեն էական էլ չէ, որ իշխանությունը նախատեսել է ամառվա ընթացքում քննարկել Հարկային օրենսգիրքն ու արդեն փոփոխված տարբերակը աշնանը ներկայացնել ԱԺ։ «Մարդիկ կտեսնեն իրենց ձեռնուտու չէ այդպես ապրել երկրում կթողնեն, կգնան, իսկ երբ իշխանությունը հասկանա ու ցանկանա փոփոխություններ անել, արդեն ուշ կլինի, որովհետև գնացածը հետ չի գա»,-եզրափակեց քաղտեխնոլոգը:

Տաթեւիկ Աբրահամյան