Թրաֆիքինգի գործով ամբաստանյալի մայրը տեղյակ է եղել, որ դուստրը «սիրած» է ունեցել

Սեռական շահագործման նպատակով կանանց թրաֆիքինգի մեջ մեղադրվող Հերիքնազ Խաչատրյանի գործով այսօր դատարանում պաշտպանական կողմի միջնորդությամբ հարցաքննվեցին ամբաստանյալի մայրը և քույրը:

Նախ նշենք, որ ամբաստանյալի մայրը հայտարարեց, որ գործով անցնող 5 վկաներից ոչ մեկին չի ճանաչում, այնինչ նրանցից մեկը եղել է ամբաստանվող դստեր մտերիմ ընկերուհին, իսկ մյուսն էլ շուրջ 7 տարի բնակվել է իրենց տանը:

Ըստ վկայի՝ ամբաստանվող դուստրը 2007թ. մեկնել է Դուբայ, իսկ մեկ տարի անց վտարվել է ու մեկնել Մոսկվա, այնտեղից էլ՝ Լենինգրադ, որտեղ մի կին իրեն ապաստան ու աշխատանք է տվել:

Մոր խոսքով՝ դուստրը 7-8 ամիս անց վերադարձել է Հայաստան, ապա մյուս դստեր հետ մեկնել Թուրքիա, որտեղ և զբաղվել է առևտրով:

Ամբաստանյալի մայրը դատարանում վստահեցրեց, որ դուստրը երկրորդ անգամ Դուբայ չի գնացել, այլ եղել է Թուրքիայում, որտեղ և ունեցել է «սիրած»:

Այդ ընթացքում, մոր պնդմամբ, Հերիքնազը իրեն զանգահարել է 4-5 անգամ, և զանգահարել է իրենց տան քաղաքային հեռախոսին, քանի որ ինքը բջջային հեռախոս չի ունեցել: Մի քանի անգամ էլ «ռուբլի» է ուղարկել:

Չնայած որ մայրն անհանգստացել է դստեր համար, սակայն Հերիքնազի հեռախոսահամարը ինքը չի ունեցել և չի էլ ցանկացել պարզել:

Դուստրերի՝ Հերիքնազի և Բավականի առերևույթ վատ հարաբերությունների վերաբերյալ մայրը հայտնեց, որ «յոլա չեն գնում իրար հետ», բայց թե ի՞նչն է պատճառը մինչ այժմ ինքը չգիտի, քանի որ չի կարողացել նրանց առերես նստեցնել ու հարցնել, իսկ առանձին-առանձին խոսելիս Բավականն ասել է՝ չի ցանկանում Հերիքնազի հետ շփվել, իսկ Հերիքնազի պարագայում՝ «Աստծո կամոք տեսնենք ինչ ա լինում, կպարզվի»,- ասաց վկան՝ նկատի ունենալով գործի ավարտից հետո:

Վկան պնդեց, որ Հերիքնազի՝ Դուբայում գտնվելու մասին ինքը ոչ ոքի չի հայտնել:

Հաջորդիվ հարցաքննվեց Հերիքնազի քույրը, ով նշեց, որ տուժողներից 3-ին ճանաչում է:

Ամբաստանյալի քույրը փորձեց դատարանին համոզել, որ քույրերը՝ Հերիքնազը և Բավականը շատ վատ հարաբերությունների մեջ են, սակայն պատճառների մասին չցանկացավ բարձրաձայնել:

Վկաներ մոր և դստեր ցուցմունքներում էական հակասություններ կային. մայրը հայտնեց, որ Հերիքնազի՝ Դուբայում գտնվելու մասին ոչ ոքի չի ասել, իսկ վկա դուստրը հակառակը պնդեց, որ այդ մասին տեղեկացել է հենց մորից:

Մանրամասները՝pastinfo.am-ում