Տուժող կողմը Վարդան Պետրոսյանից փոխհատուցում է պահանջում

Փաստինֆոն գրում է. Վարդան Պետրոսյանի գործով տուժողի իրավահաջորդի ներկայացուցիչ Ռուբեն Բալոյանը Կոտայքի մարզի ընդհանուր իրավասության դատարանում, դատական նիստի մեկնարկին, միջնորդեց դատարանին վերսկսել դատաքննությունը:

Ռուբեն Բալոյանը ներկայացրեց տուժող կողմի` վարդան Պետրոսյանի դեմ քաղաքացիական հայց հարուցելու որոշումը, որով վերջինները Վարդան Պետրոսյանից պահանջում են վնասի փոխհատուցում` շուրջ 13 մլն դրամի չափով:

Իր միջնորդության մեջ Ռուբեն Բալոյանն անդրադարձավ «Նիվա» ավտոմեքենայի ուղևորուհի Տաթևիկ Հակոբյանի` վթարի հետևանքով ստացած վնասվածքներին, դրանց բուժման համար Հակոբյանների համար կատարած ծախսերին` դրանք հիմնավորելով անդորրագրերով, ընդամենը` 445 213 դրամի չափով:

Փաստաբանը նշեց նաև, որ Տաթևիկ Հակոբյանն ավտովթարի հետևանքով ստացած վնսավածքներից վերջնականորեն չի ապաքինվել, ուսիտ՝ նրան անհրաժեշտ է ևս մեկ վիրահատություն` 250 000դրամ արժեքով և շուրջ 2 տարի տևողությամբ վերականգնողական բուժում: Եվ քանի որ բուժման մեկ օրվա արժեքը կազմում է 15 000 դրամ, ապա, փաստաբանի ներկայացրած հաշվարկով, 2 տարվա բուժումը կարժենա 7 830 000 ՀՀ դրամ:

Բացի այդ, քանի որ տուժողը չի կարող օգտվել հասարակական տրանսպորտից, նա բուժման պետք է հաճախի տաքսիով, որի 2 տարվա արժեքը հաշվարկվել է 1 440 000 դրամ:

Ռուբեն Բալոյանը ներկայացրեց նաև տուժող Արթուր Հակոբյանի բուժման ծախսերը, որոնք կազմում են 145 800 դրամ: Եվս 1 մլն դրամ Արթուր Հակոբյանը պետք է վճարի իրեն` Ռուբեն Բալոյանին` փաստաբանական ծառայությունների դիմաց: Եվս 400 000-ական դրամ արժեքով պայմանագրեր Ռուբեն Բալոյանի հետ կնքել են նաև տուժողներ Նաիրա Հայրապետյանն ու Աննա Կարապետյանը, և 250 000-ական դրամի պայմանագրեր` տուժող Հայկ Հակոբյանն ու Էմմա Հակոբյանը:

Այսպիսով, տուժողների ներկայացուցիչը դատարանին միջնորդեց դերասան Վարդան Պետրոսյանից բռնագանձել շուրջ 13 մլն դրամ:

«Որպես մի մարդ, որ պատրաստ է եղել ոչ թե այդքան,այլ կրկնակի վճարել և իր կյանքը ներդնել, շատ ցավում եմ, որ այսօր հասանք այնտեղ, որ և կրճատեցինք գումարը և ուշացրեցինք Տաթևիկի բուժումը»,- տուժողների փոխհատուվման պահանջի վերաբերյալ ասաց Վարդան Պետրոսյանը՝ հավելելով. «Տաթևիկի բուժումը պետք էր սկսել փետրվարից, պետք էր չձգձգել մինչև այսօր»: