"Տուրիզմը պետք է դառնա երկիրը ներկայացնելու, հետո արդեն փող աշխատելու միջոց"

Սեդրակ Մամուլյանը ֆեյսբուքյան իր էջում գրում է.

Տուրիզմ կոչված բառակապակցությունն ուղղակի միջոց է փող աշխատելու համար: Այնինչ պետք է հակառակը լիներ: Տուրիզմը պետք է լինի երկիրը և դրա մշակույթը ներկայացնելու միջոց, հետո արդեն սրա արդյունքում փող կաշխատեն:

Նման կարծիք հայտնեց Հայ խոհարարական ավանդույթների զարգացման և պահպանման հ/կ նախագահ Սեդրակ Մամուլյանը: Մամուլյանի խոսքով տուրիզմով զբաղվող մարդիկ, ովքեր շատ դեպքերում անգամ մասնագետներ չեն, մատների արանքով են նայում այս ոլորտին. «Կա գումար, կա տարածք, մի բարեկամ օրինակ Լեհաստանում և վերջ. տուրիստական ընկերությունը ձևավորված է: Կան երիտասարդներ, ովքեր գիտեն մեկ-երկու անգլերեն բառ և նրանց թվում է, որ արդեն կարող են զբաղվել տուրիզմով»:
Մամուլյանը փաստում է, որ հիմնականում հենց նման մոտեցման է բախվում հայկական իրականության մեջ: Տուրիզմի մեջ ներգրավված անձինք նույնիսկ շատ դեպքերում չեն կարողանում ըստ Մամուլյանի ասել, թե ինչ է ներգրավված տուրերի մեջ: «Մինչդեռ տուրի կարևորագույն երեք մասնիկները հետևյալներն են. տեսանք, ճաշակեցինք, զվարճացանք: Իսկ ի՞նչ մոտեցման ենք բախվում մեր երկրում»:
Սեդրակ Մամուլյանի պնդմամբ Հայաստանում խոհանոցը որպես մշակութային արժեք չի ընկալվում, որպես զբոսաշրջային ապրանք չի ընդունվում. «Զբոսաշրջիկները, հոգնած, օրեկան 4-5 եկեղեցի այցելած, նախ հերթ են կանգնում պետքարանի մոտ, հետո սկսում են մտածել սնվելու մասին: Այս պարագայում ուտելիքը նրանց համար դառնում է քաղցը հագեցնելու միջոց: Բայց չէ որ ռեստորանում տուրը շարունակվում է: Կամ էլ վատագույն դեպքում նրան չեն բացատրում, թե նա ինչ է ուտում»:
Պարոն Մամուլյանն այս հարցում մեծապես տեսնում է տուրիստական ընկերությունների մեղքը, քանի որ նրա խոսքերով այս կազմակերպությունները պայմանավորվածություն են ձեռք բերում արագ սննդի կամ ուղղակի իրենց ծանոթ ռեստորանների հետ և զբոսաշրջիկների՝ քաղցը հագեցնելու ցանկությունը բավարարում նման վայրերում, որոնք շատ դեպքերում կիլոմետրերով հեռու են ազգային խոհանոցից: Հ/կ-ի նախագահի խոսքերով պետք է հանարաճանաչ դարձնել ազգային մշակույթը, ինչը տվյալ ոլորտում գործող մասնագետների գործն է: Պետք չէ ամեն ինչ բարդել երկրի կառավարության կամ մշակույթի նախարարության վրա:
«Մեր կազմակերպության անունից հայտնում եմ, որ մեր ՀԿ-ն անվճար դասընթացներ կանցկացնի տուրիստական կազմակերպությունների աշխատակիցների հետ՝ նրանց ծանոթացնելով ազգային մշակույթի մաս կազմող ազգային խոհանոցի հետ»,- լրագրողների հետ հանդիպման ավարտին հիշեցրեց բանախոսը: