Ուր է հասնում Սուրիկ Խաչատրյանի դեմ իրականացված մահափորձի գործը

Սյունիքի մարզպետ Սուրիկ Խաչատրյանի դեմ մահափորձի գործով մեղադրյալ Գարեն Աթաջանյանին նախաքննական մարմինը փորձում է ազատ արձակել: «Իբր առողջական խնդիրներ ունի, բայց դա իրականում այդպես չէ, նա գործարքների մեջ է մտել»,-Fnews.am-ի հետ զրույցում ասաց մեղադրյալ Արա Բուդաղյանի պաշտպան Հայկ Ալումյանը: Նա տեղեկացրեց, որ Գարեն Աթաջանյանը զրպարտչական ցուցմունք է տվել Բուդաղյանի դեմ: «Գարեն Աթաջանյանին նախաքննական մարմինն անօրինական գործարք է առաջարկել՝ զրպարտչական ցուցմունք տալ իմ պաշտպանյալի դեմ եւ ազատ արձակվել: Գործընթացն արդեն սկսվել է»,-ասաց Հայկ Ալումյանը:

Գարեն Աթաջանյանի փաստաբան Մհեր Բադալյանից էլ հետաքրքրվեցինք, թե ինչպես է իր պաշտպանյալի առողջությունը.«Ես բան չեմ կարող ասել, գործը գտնվում է նախաքննության փուլում, ես մի քանի անգամ տարբեր լրագրողների հայտնել եմ, որ նախաքննության փուլում որևէ մեկնաբանություններ, պատճառաբանություններ, կամ որևէ բաներ չեմ կատարում»,-ասաց փաստաբանը:

Իսկ ահա Գարեն Աթաջանյանի մյուս փաստաբան Վահան Հովհաննիսյանն էլ բացառեց, որ Գարեն Աթաջանյանը կարող է պայմանավորվածություններ ունենալ. «Ինչ վերաբերում է պարոն Ալումյանի հայտարարությանը, անկախ նրանից ես մասնակցում եմ, կամ չեմ մասնակցում, օբյեկտիվ իրականության մեջ ես բացառում եմ, որ որևէ տեսակի համագործակցություն, որևէ տեսակի քննչական, կամ այլ իրավապահ մարմինների հետ: Եթե անգամ առկա է ցուցմունք, ուրեմն առկա է ճշմարտացի ցուցմունք, որևէ պայմանավորվածություն ես բացառում եմ, անգամ ծանոթ չլինելով քննչական վերջին գործողություններին»:

Նշենք, որ Արա Բուդաղյանը Սյունիքի մարզպետի տան մոտ սպանված Ավետիքի ու վիրավորված գնդապետ Արտակ Բուդաղյանի եղբայրն է: Հիշեցնենք, որ Սյունիքի մարզպետ Սուրիկ Խաչատրյանի եւ նրա ուղեկիցների նկատմամբ 2015թ. մայիսի 20-ին հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին, ձերբակալվել, ապա կալանավորվել են ՀՀ Սյունիքի մարզի Կապան քաղաքի բնակիչներ՝ Գարեն Աթաջանյանը, Հենրիկ Ավագյանը եւ Գորիս քաղաքի բնակիչներ՝ Վիտալի Մինասյանը եւ Արա Բուդաղյանը: