Ուղղաթիռի խոցման տեսանյութը համացանցում հրապարակած զինվորը պատժվել է

Ադրբեջանցի զինվորը, որը ղարաբաղյան ուղղաթիռի կործանման տեսանյութն էր արել և հրապարակել այն սոցիալական կայքերում, պատժված է: Այս մասին հայտնել է Ադրբեջանի Պաշտպանության նախարարության մամլո ղեկավար Վագիֆ Դերաղլին, պատասխանլով պատգամավոր Ագիլ Աբասի նկատառումը,-փոխանցում է ANS հեռուստաընկերությունը:

Համաձայն աղբյուրի, նախօրեին պետական ներկայացուցիչների և ԶԼՄ-ների ներայացուցիչների մասնակցությամբ տեղի է ունեցել նիստ, որի ընթացքում քննարկվել են տեղեկատվական անվտանգության վերաբերող հարցեր:

Նիստի ընթացքում պատգամավոր Ագիլ Աբասը հարց է բարձրացրել այն մասին, պատժվել է արդյոք այն զինվորը, որը համացանցում տեղեկատվություն է է հրապարակել ղարաբաղյան խոցված ուղղաթիռի վերաբերյալ:

Վագիֆ Դերաղլին հայտարարել է, որ զինվորի անձը հաստատվել է: «Նրա վերաբերյալ ձեռնարկվել են լուրջ միջոցներ: Պարզապես կա տեղեկատվություն, որ մենք չենք կարող բացահայտել և խնդրում ենք, որ դրան մոտենանք ըմբռնումով»:

Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։