Վ. Գասպարյան. Մեր գլխավոր նպատակը ոստիկանության հանդեպ հանրային հավատի ու վստահության ամրապնդումն է

 <<Содружество>> ամսագիրն իր վերջին համարում ներկայացնում է հարցազրույց ՀՀ ոստիկանության պետ﹐ գեներալ-լեյտենանտ Վլադիմիր Գասպարյանի հետ: Ներկայացնում ենք հարցազրույցը̀ հատվածներով:

Հատված 4-րդ
ՀԱՐՑ - Հայաստանը հոգևոր մշակույթի խոր արմատներ ունեցող երկիր է: Այդ հանգամանքն իր հետքը թողնո՞ւմ է ոստիկանների վարքագծի վրա: Ոստիկանությունը համագործակցո՞ւմ է կրոնական կազմակերպությունների հետ: 

- Հիշո՞ւմ եք Սուրբ գրքի խոսքը՝ եթե մանանեխի հատիկի չափ հավատ ունենաս... Առանց հավատի հնարավոր չէ ոչինչ անել: Բայց մենք քրիստոնեությունն աշխարհում առաջինը պետականորեն ընդունած ժողովուրդն ենք, ուրեմն հավատավոր ենք: Եվ ոստիկանությունն այդ ժողովրդի ու պետության մասն է: Մեր ստորաբաժանումներում մատուռներ կան, մեր ծառայողների սեղանին Սուրբ Ավետարանն է, վերափոխվում է ոստիկանի հոգևոր և բարոյական արժեհամակարգը, ինչին է միտված ծավալուն գործակցությունը Հայ Առաքելական Եկեղեցու հետ: Բայց՝ ոչ միայն: Օրինակ, մենք շատ ենք կարևորում մեր նոր համազգեստը և այդ փոփոխությունը դիտում ենք ոչ թե նյութական, այլ հենց հոգևոր ու հոգեբանական նորացման դաշտում: Ընդամենը գեղեցիկ խոսք չէ <Նոր գինին՝ նոր տիկերում> արտահայտությունը, այլ՝ մի ամբողջ փիլիսոփայություն: Իսկ մեզ համար՝ գործունեության սկզբունք. Ոստիկանությունում պետք է նորանա ամեն ինչ, իսկ դա պայմանավորված է առաջին հերթին նոր ոստիկանի ձևավորմամբ, նոր՝ և՛ էությամբ, և՛ գիտելիքներով, և՛ աշխատաոճով ու աշխարհընկալմամբ: Սա բարեփոխումների հաջողության գրավականն եմ համարում, և ամեն ինչ անելու ենք վերափոխման այս ամբողջականությունն իրականացնելու համար: Հակառակ դեպքում ոչինչ չի ստացվի: Ի դեպ, այս ամենը նաև ազգային ավանդույթի շրջանակում է. մեզ հատուկ են պատվախնդրությունը, նպատակին հասնելու կամքը, ստեղծելու մղումը: Մեզ ասելով՝ նկատի ունեմ և՛ մեր ժողովրդին, և՛ իր ոստիկանությունը...

ՀԱՐՑ - Ոստիկանության բոլոր բարեփոխումներից արդյունքում պետք է շահի առաջին հերթին սոցիալական ծառայությունների սպառողը: Պարզեցվե՞լ են, արդյոք, ոստիկանության ու քաղաքացու շփման սխեմաները: 

- Արդեն խոսեցի հավատի մասին՝ ոստիկանության գործի և արդարության հանդեպ մե՛ր հավատի: Սակայն հաջողության հասնելու համար մի բաղադրիչ էլ է անհրաժեշտ՝ հասարակությա՛ն հավատը ոստիկանության հանդեպ, առանց որի պարզապես չկա ժամանակակից ոստիկանություն: Այդ հավատն ու վստահությունը ծնվում են ոստիկանի աշխատանքը տեսնելու և գնահատելու արդյունքում: Տեսե՛ք՝ ճանապարհային ոստիկանություն, անձնագրային և վիզաների վարչություն, համայնքային ոստիկանություն, պետական պահպանության վարչություն, պարեկապահակետային ծառայություն... Սրանք այն ստորաբաժանումներն են, որ ամենօրյա շփման ամենամեծ մակերեսն ունեն հասարակության հետ: Ստացվում է, որ մեր ծառայության գերակշիռ մասը հենց ծառայություն է հասարակությանը, և մենք չէինք կարող բարեփոխումների ծրագրով չթիրախավորել հենց այդ ոլորտները: Ու հենց այդտեղ էլ հսկայական աշխատանք է կատարվել:
Անձնագրային և վիզաների վարչության ոլորտում ներդրվել է նույնականացման քարտերի և կենսաչափական տվյալներով նոր անձնագրային համակարգը, գործում է քաղաքացիների ընդունելության <մեկ դահլիճի սկզբունքը, քաղաքացիության հարցերի վերաբերյալ դիմումների քննարկման համար նախատեսված մեկամյա ժամկետը փոխարինվել է 6-ամսյա ժամկետով, պարզեցվել է օտարերկրյա պետություններում գտնվող անձանց ՀՀ քաղաքացիություն շնորհելուց հետո Հայաստանի Հանրապետություն մուտք գործելու գործընթացը, քաղաքացիներն օնլայն կարող են հետևել փաստաթղթերի տրամադրման ողջ գործընթացին և այլն, և այլն: Սա՝ միայն անձնագրային և վիզաների վարչության աշխատանքի բնագավառում: Ճանապարհային երթևեկության անվտանգության ոլորտում ընդունվել են երեք տասնյակից ավելի իրավական ակտեր, շահագործվել է Ճանապարհային ոստիկանության Երևան քաղաքի հաշվառման-քննական ընդհանուր ստորաբաժանումը՝ նոր վարչական շենքով և քննական ավտոդրոմով, ավարտվել են արագության վերահսկման ավտոմատ համակարգի ներդրման աշխատանքները /104 տեսանկարահանող և 161 արագաչափ սարքեր/, կահավորվել և շահագործման է հանձնվել խախտումների արձանագրման կենտրոնը, ՃՈ հաշվառման-քննական բոլոր ստորաբաժանումներում տեղադրվել են տրանսպորտային միջոցների պլաստիկ քարտի տեսքի հաշվառման վկայագրերի տպագրման սարքեր, Ճանապարհային ոստիկանության ճանապարհապարեկային ծառայության շուրջ 200 պարեկային ավտոմեքենա կահավորվել են դյուրակիր համակարգիչներով և այլն, և այլն… Չծանրաբեռնեմ ձեզ թվարկումով, ընդամենը ասեմ, որ փոփոխությունները ծավալուն են հասարակությանը ծառայություններ մատուցող նաև մյուս բնագավառներում: Հուսով եմ, որ քաղաքացին տեսնում ու գնահատում է այս փոփոխությունները, կարծում եմ՝ նույնիսկ որոշ դեպքերում բավարարվածության զգացում ունի, սակայն, կրկնված լինեմ, կատարված աշխատանքը մեզ չի բավարարում: Շատ պարզ պատճառով. կյանքը հարաշարժ գործընթաց է, մշտական զարգացման մեջ, ըստ այդմ փոխվում ու զարգանում են նաև հասարակության պատկերացումներն ու պահանջները, և ոստիկանությունը, իմ համոզմամբ, ոչ թե պետք է համաքայլ ընթանա, այլ մի քայլ էլ առաջ լինի այդ զարգացումներից: 

ՀԱՐՑ - Բնակչությունն այսօր ինչպե՞ս է գնահատում ոստիկանության աշխատանքը: Քաղաքացիները որքանո՞վ են վստահում ոստիկանությանը:

- Մեր գլխավոր նպատակն, ինչպես ասացի, ոստիկանության հանդեպ հանրային հավատի ու վստահության ամրապնդումն է: Բայց մենք այդ կարգի վիճակագրություն ու հաշվարկներ չենք անում: Մենք աշխատում ենք, կատարում մեր առաքելությունը, նպատակ ունենք ու գնում են դեպի այդ նպատակը: Ես ընդամենը մի քանի օրինակ բերեմ, փորձենք դրանցից արտածել ձեր հարցի պատասխանը:
Այս երեք տարիներին աննախադեպ աճել է ոստիկանություն դիմող քաղաքացիների թիվը: Խոսքը հանցագործության վերաբերյալ հայտարարության մասին չէ, այլ ամենատարբեր, այդ թվում՝ հաճախ ոստիկանության գործունեության հետ կապ չունեցող ոլորտների առնչվող դիմումների: Սա ինձ շատ է ուրախացնում. մարդիկ որևէ գերատեսչություն դիմում են, եթե հավատում են, համոզված են, որ պատասխան ու օգնություն կստանան: Ուրեմն ոստիկանության հանդեպ այդ վստահությունը մեր քաղաքացիների մեջ աստիճանաբար ձևավորվում է: Ուրախալի են նաև քաղաքացիների կողմից ոստիկաններին ցուցաբերված ուղղակի աջակցությունը: Տասնյակ են դեպքերը, երբ մարդիկ մասնակցել են հանցագործության բացահայտման, հանցագործի հայտնաբերման ու վնասազերծման: Կամավո՛ր, ներքի՛ն մղումով, որը հիմնված է ոստիկանության գործունեության ու մեր գործի արդարության հանդեպ հավատի վրա... Եվս մի օրինակ: Ոստիկանություն-հասարակություն կապը մենք իրականացնում ենք նաև տեղեկատվական տեխնոլոգիաների միջոցով, և ահա անցած տարի ոստիկանության շուրջօրյա ինտերնետային կայքը <Ինֆորմացիայի ազատության կենտրոն> հասարակական կենտրոնի կողմից կազմակերպված տեղեկատվության ազատության մրցանակաբաշխությունում արժանացավ <Ոսկե բանալի> մրցանակին և <Տեղեկատվության տրամադրման լավագույն ինտերնետային պաշտոնական կայք> անվանակարգում հաղթողի կոչմանը: Սա էլ՝ քաղաքաիական հասարակության գնահատականը...
Հաճելի է, իհարկե, գնահատված լինելը, բայց, նորից եմ ասում, մենք գնահատականի ու վարկանիշի համար չենք աշխատում: Հանցավորության դեմ դեմ պայքարի, հասարակական կարգի պահպանման, հանրությանը ծառայություն մատուցելու ոլորտներում մեր գերխնդիրը օրինականության պահպանումն է, քաղաքացու իրավունքների պաշտպանությունը, օրենքի գերակայության ապահովումն ու օրենքի առաջ բոլորի հավասարության սկզբունքի կիրարկումը: Հենց այդ դաշտում հաջողելու համար մեզ օդ ու ջրի պես անհրաժեշտ էր բարեփոխումը, որի արդեն երկրորդ փուլն ենք սկսել և հասցնելու ենք տրամաբանական ավարտին: