Վաչեն SMS ուղարկեց աղջկան, ով ընկեր ուներ ու սկսեց << ռազբորկան >>

Վերաքննիչ քրեական դատարանում ընթանում է Էրիկ Մկրտչյանի, Սերգեյ Շահբազյանի և Հայկ Ղարիբյանի գործով բերված վերաքննիչ բողոքների քննությունը:

Գործը քննվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Լևոն Ավետիսյանի նախագահությամբ:

2013 թվականի հոկտեմբերին Երևանի Մամիկոնյանց փողոցի ավտոտնակներից մեկի ներսում բուռն կռիվ է եղել՝ աղջկան զանգելու առիթով:

Ըստ գործի տվյալների՝ Էրիկ Մկրտչյանի բարեկամ Հրանտի ընկերը՝ Վաչեն, հեռախոսով հաղորդագրություն է ուղարկել մի աղջկա՝ իր նախկին գործընկերուհուն, ում համակրել է: Բայց աղջիկն ընկեր է ունեցել,  ինչի մասին տեղյակ է եղել Հրանտը:

Աղջկա ընկերը՝ Սերգեյը, կարդացել է հաղորդագրությունը, զանգահարել է Հրանտին: Պայմանավորվել են հանդիպել:
Հանդիպման Սերգեյը գնացել է իր ընկեր Հայկի հետ:
Հրանտը նրանց հրավիրել է իրենց բնակարան, որտեղ սեղան էր բացված Հրանտի՝ ինքնասպան եղած եղբոր հիշատակին:

Սերգեյը Հրանտին ու նրա ընկեր Վաչեին բացատրել է, որ աղջկա փեսացուն է, իրենք շուտով ամուսնանալու են: Խնդրել է աղջկան չանհանգստացնել:

Սերգեյն ու Հայկը հեռացել են:

Սակայն Հրանտը քիչ անց նորից է զանգել աղջկա հեռախոսահամարին: Պատասխանել է Սերգեյը:

Հրանտը խնդրել է հեռախոսը փոխանցել աղջկան, պատճառաբանել է, թե նրան ասելու բան ունի:

Սերգեյն ավելի է զայրացել, ասել է՝ նույն տեղո՞ւմ եք, հիմա գալիս եմ…

Հանդիպումը կայացել է Հրանտի հորեղբոր «գարաժում»:

Հանդիպմանը Սերգեյի հետ գնացել են Հայկը և պատահաբար Հայկի կողքին հայտնված հարևանը՝ Մանուկը:

Հրանտենք էլ չորս հոգով էին, նրանց հետ է եղել նաև Էրիկ Մկրտչյանը:

Հրանտը ներսից բանալիով փակել է ավտոտնակի դուռը:

Սերգեյը, Հայկն ու Մանուկը ավելի հաղթանդամ էին, ֆիզիկապես ավելի ուժեղ, բայց Հրանտենք էլ չորսով էին…

Փակված տարածքում կռիվ է սկսվել:

Նախաքննական մարմինը Հայկին ու Սերգեյին մեղադրանք է առաջադրել խմբի կազմում երկու հոգու միջին ծանրության վնասվածքներ հասցնելու համար՝ ՀՀ քրեական օրենսգրքի 113 հոդվածի 2-րդ մասի 1-ին և 3-րդ կետերով:

Կռվի ընթացքում Էրիկ Մկրտչյանը դանակով հարվածել է Մանուկ Հարությունյանի կրծքին, ապա մի քանի հարված է հասցրել Հայկին՝ վերջինիս պատճառելով ծանր վնասվածք:

Երբ ավտոտնակում մի քանի հոգի արնաշաղախ են եղել, Հրանտը խառնվել իրար, դռան բանալին գցել է ձեռքից:

Սերգեյը բացել է ավտոտնակի դուռը…

Կռվողներն իրենց դուրս են նետել ավտոտնակից…

Նախաքննական մարմինը Էրիկ Մկրտչյանին մեղադրանք է առաջադրել ոչ թե ըստ հետևանքի՝ ծանր մարմնական վնասվածք պատճառելու, այլ՝ ավելի ծանր արարքի՝ սպանության փորձ կատարելու համար՝ ՀՀ քրեական օրենսգրքի 34-104 հոդվածի 1-ին մասով:

Ամբաստանյալներից անազատության մեջ է սպանության փորձի համար մեղադրվող 24-ամյա Էրիկ Մկրտչյանը, իսկ 28-ամյա Սերգեյի և 31-ամյա Հայկի խափանման միջոցը ստորագրությունն է չհեռանալու մասին:

Ավտոտնակային պարզաբանումից հետո Սերգեյն ամուսնացել է այն ընկերուհու հետ, ում անհարկի զանգելու համար այս կռիվը եղել է: Ներկայումս նրանք արդեն երեք ամսական երեխա ունեն…

Այս գործով մեղադրողները Էրիկ Մկրտչյանի համար միջնորդել էին 8 տարի 6 ամիս ազատազրկում, Սերգեյ Շահբազյանի համար՝ 1 տարի 3 ամիս ազատազրկում և 100 հազար դրամ տուգանք, Հայկ Ղարիբյանի համար՝ 1 տարի ազատազրկում:

Ընդհանուր իրավասության դատարանը Էրիկ Մկրտչյանին մեղավոր է ճանաչել սպանության փորձի համար և դատապարտել է 8 տարի ազատազրկման:

Սերգեյ Շահբազյանն ու Հայկ Ղարիբյանը դատապարտվել են 1-ական տարի ազատազրկման, նրանց նկատմամբ պայմանական դատապարտություն է կիրառվել, և յուրաքանչյուրի համար սահմանվել է 1 տարի փորձաշրջան:

Այս դատավճռի դեմ վերաքննիչ բողոքներ էին բերել Էրիկ Մկրտչյանի շահերի պաշտպան, փաստաբան Զուռնաչյանը, ինչպես նաև մեղադրանքը պաշտպանող դատախազ Մնացականյանը:

Պաշտպանն իր բողոքում նշել է, թե Էրիկ Մկրտչյանի մեղքը մեղսագրված հոդվածով ապացուցված չէ, հանցակազմի բացակայության հիմքով նա ենթակա է արդարացման: Իսկ եթե դատարանը Էրիկի մեղքը հիմնավորված համարի, ապա պետք է ճիշտ քրեաիրավական գնահատական տա նրա արարքին, նրան մեղավոր ճանաչի ոչ թե սպանության փորձի, այլ դիտավորությամբ տուժողի առողջությանը ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Մեղադրողը վերաքննիչ բողոք է բերել Սերգեյ Շահբազյանի և Հայկ Ղարիբյանի նկատմամբ սահմանված պատիժների մասով:

Ըստ մեղադրողի՝ նրանց նկատմամբ պայմանական դատապարտության կիրառման հիմքեր չկան, նրանք պիտի դատապարտվեն իրական ազատազրկման, պետք է նրանց «պատժից վերացնել պայմանական դատապարտության կիրառումը»:

Ընդհանուր իրավասության դատարանում երեք ամբաստանյալներն էլ պաշտպաններ ունեին, իսկ վերաքննիչում Շահբազյանն ու Ղարիբյանն ասացին, թե պաշտպան չունեն:

Ղարիբյանը մռայլ տոնով ասաց. «Մեր ամենալավ պաշտպանը դատարանն է»:

Մանրամասն՝ 1in.am