Վանաձորում դանակահարություն կատարողը ՌԴ-ում հայտնաբերվել ու վերադարձվել է Հայաստան

Վանաձորում կատարված դաժան դանակահարության մեջ կասկածվող Հրայր Հ-ն, ում նկատմամբ հետախուզում էր հայտարարվել, դեռևս 2014թ-ի փետրվարի հայտնաբերվել ու ձերբակալվել էր ՌԴ-ում:

Իսկ դեկտեմբերի 11-ին նրան տեղափոխել են Հայաստան ու կալանավորել:

Շուրջ 1 տարի առաջ հարուցված, ապա կասեցված քրեական գործի վարույթը Քննչական կոմիտեի Լոռու մարզային քննչական վարչությունում վերսկսվել է:

2013 թվականի հոկտեմբերի 12-ի երեկոյան Վանաձորի Տիգրան Մեծ փողոցում Հրայր Հ-ն ընկերոջ` Սերյոժա Ս-ի հետ վիճաբանել են Սեյրան Հ-ի հետ, նրա հասցեին տվել հայհոյանքներ` անտեսելով ոչ միայն նրա կնոջ ու անչափահաս դստեր ներկայության փաստը, այլև անցորդների դիտողությունները:

Ապա Հրայր Հ-ն ձեռքերով ու դանակով բազմաթիվ հարվածներ է հասցրել Սեյրան Հ-ին և նրա կնոջը` Կարինե Մ-ին՝ վերջինին պատճառելով թեթև մարմնական վնասվածք:

Իսկ Սեյրան Հ-ին փորձել է սպանել` անտեսելով կնոջ և դստեր՝ չհարվածելու խնդրանքները: Բացառիկ դաժանություն ցուցաբերելով՝ նա դանակով բազմաթիվ հարվածներ է հասցրել Սեյրան Հ-ի կրծքավանդակի ու մարմնի տարբեր մասերին: Բայց, բարեբախտաբար, հանցագործությունն ավարտին չի հասցրել, քանի որ անցորդներից մեկը միջամտել ու կանխել է դա` փրկելով Սեյրանի կյանքը:

Քրեական գործի նախաքննությունը շարունակվում է: Հրայր Հ-ի ընկերոջ` Սերյոժա Ս-ի նկատմամբ ևս հայտարաված է հետախուզում: